Kınoteatrlarda kórsetiletin fılmderdiń mazmunyna baqylaý kúsheıedi

ASTANA. KAZINFORM – Qazaqstanda «Kıno týraly» zańǵa birqatar ózgeris engiziledi. Tolyǵyraq Mádenıet jáne aqparat mınıstri Aıda Balaeva aıtyp berdi.

- Kıno – ıdeologııanyń mańyzdy quraly. Osyǵan oraı, kınoteatrlarda kórsetiletin fılmderdiń mazmunyn baqylaýdy kúsheıtý mindeti aldymyzǵa qoıyldy. Osy maqsatta kınoprokat naryǵyn retteýge múmkindik beretin zańnamany jetildirý jumystary bastaldy, - dedi Aıda Balaeva elordada ótken ardagerler keńesiniń plenýmynda.

Mınıstrdiń málimdeýinshe, «Kıno týraly» zańǵa kelesi ózgeristerdi engizý josparlanyp otyr:

- Fılmderdi aldyn ala qaraý jáne prokatqa deıingi saraptama úshin komıssııa qurý;

- Prokat kýáligin berý merzimin 7 jumys kúninen 20 jumys kúnine deıin uzartý;

- Kınoteatrlarda kórsetiletin fılmderdiń tolyq túpnusqasyn usynýdy mindetteý.

- Ókinishke qaraı, qoldanystaǵy zańnamaǵa sáıkes, biz tek qysqa treılerlerdi (tızerlerdi) ǵana qaraýǵa quqyǵymyz bar. Sondyqtan fılmniń mazmunyn, ondaǵy jaǵymsyz kontenttiń nemese jat ıdeologııanyń bar-joǵyn anyqtaı almaımyz, - deıdi ol.

Buǵan deıin otandyq kıno salasyna bólinetin qarjy tsıfrlyq baqylaýda bolatynyn habarlaǵan bolatynbyz. 

Sondaı-aq, Úkimet basshysy Oljas Bektenov elimizde fılmnen túsetin paıdanyń kóbi kınoteatr ıeleriniń qaltasynda qalatynyn aıtqan edi. 

Aıta keteıik, búgin elordada respýblıkalyq ardagerler uıymy keńesiniń kezekti plenýmy ótti. Oǵan elimizdiń barlyq óńirinen ardagerler keńesiniń tóraǵalary qatysty.