Kınoteatrlar ulttyq fılmderdi kórsetýge qyzyǵýshylyq tanytpaı otyr
ASTANA. KAZINFORM – Kınoteatrlar ulttyq fılmderdi kórsetýge qyzyǵýshylyq tanytpaı otyr. Bul týraly Májilis depýtattarynyń saýalyna Premer-mınıstrdiń orynbasary – Mádenıet jáne aqparat mınıstri Aıda Balaevanyń jaýabynda aıtylǵan.
– Kınoteatrlar tabys ákeletin jeńil oıyn-saýyq kartınalarynan basqa ulttyq fılmderdi kórsetýge qyzyǵýshylyq tanytpaıdy. Memleket kınoteatrlarǵa qoldaý kórsetpeıdi jáne ulttyq fılmderdiń kórsetilimderin sýbsıdııalamaıdy. Kınoteatrlardyń zańnamalyq deńgeıde memlekettik qoldaý esebinen óndirilgen fılmderdi kórsetý mindeti týraly normany engizý retteýshilik áserge taldaý júrgizýdi talap etedi, sebebi jeke kásipkerlik sýbektileriniń
múddelerin qozǵaıdy, - dedi vıtse-premer.
Onyń aıtýynsha, 2019 jyly «Kınematografııa týraly» zańdy ázirleý jáne 2022 jyly ózgerister engizý kezinde osyndaı normany engizý josparlanǵan. Biraq retteýshilik áserdi taldaýdyń oń qorytyndysy alynbaǵan.
– Sondaı-aq zaldar sanyn ulǵaıtý jáne jańa kınoteatrlar salý turǵysynan elimizde odan ári kıno ónerin damytý máselesin qarastyrý qajet, - dedi Aıda Balaeva.
Osy rette vıtse-premer halyqty mádenı qundylyqtar men shyǵarmashylyq ónimderge teń qoljetimdilikpen qamtamasyz etý, sondaı-aq ulttyq fılmderdiń kórsetilimderin arttyrý úshin mınıstrliktiń mynadaı usynystaryn atady:
– bıýdjet qarajatynan tys nemese memlekettik-jekeshelik seriktestik tetigi esebinen aýdandar men monoqalalarǵa basa nazar aýdara otyryp, respýblıka boıynsha kınoteatrlar/kópfýnktsıonaldy zaldar ashý;
– jergilikti atqarýshy organdar esebinen mádenıet úılerinde proektsııalyq jabdyqtardy jáne/nemese jyljymaly kıno qondyrǵylaryn satyp alý múmkindigin qarastyrý;
– zańǵa kınoteatrlardyń ulttyq kınony kórsetý mindetin retteıtin túzetý engizý.
Buǵan deıin damyǵan elder deńgeıinde kınonyń qoljetimdiligin qamtamasyz etý úshin 1 500-den astam kınozal qajet ekenin jazǵan edik.