Kınoteatrǵa qaraǵanda teatrǵa kelýshiler kóp – Baqyt Qajybaev

ASTANA. KAZINFORM – Qazaqstannyń eńbek sińirgen qaıratkeri, akter Baqyt Qajybaev teatr óneriniń orny bólek ekenin aıtady. Onyń sózinshe, sahnadaǵy eńbek pen kórermenniń ystyq yqylasy eshteńemen almastyrylmaıdy.

Akter kıeli sahnada óner kórsetý – ár ártistiń júregindegi erekshe sezim ekenin atap ótti.

– Sahnada tókken teriń, qoıylymnan keıin halyqqa bas ıip, qoshemet qabyldaǵan sát ol bólek sezim. Sol yqylasty kórgen kezde sharshaǵanyń da, qınalǵanyń da umytylady, – dedi Baqyt Qajybaev Jibek joly telearnasynyń búgin LIVE baǵdarlamasynda. 

Ol teatr men kınoǵa degen qyzyǵýshylyqtyń ara-jigin salystyra otyryp, búginde teatrǵa kelýshiler sany artyp otyrǵanyn jetkizdi.

– Jalpy kınoǵa qaraǵanda teatrǵa kelýshiler óte kóp. Keıde kontsertke bılet satqannan teatrǵa bılet satý ońaı dep jatady. Kınoteatr kúndelikti júrip jatqan dúnıe, al qoıylym aıyna bir ret, keıde úsh aıda bir ret qoıylady. Qoıylymdardy únemi qarap otyramyn, zal kórermenge toly. Demek, halyq kútedi, – dedi akter.

Akter kıno salasyna tolyqtaı aýysý josparda joq ekenin aıtty.

– Men úshin kınoǵa tolyqtaı aýysý qısynǵa kelmeıdi. Uzaq joba bolsa da, teatrdan suranyp ketýge bolady. Biraq teatrdyń esigi árqashan ashyq. Men árdaıym sahnaǵa, teatrǵa qaıta oralǵym keledi, al túbegeıli ketý oıymda joq, – dedi Baqyt Qajybaev.

Ol óz sózinde shyǵarmashylyq jolyndaǵy qyzyqty sátti de eske aldy. Onyń aıtýynsha, bastapqyda óner akademııasyna operator mamandyǵyna túsýdi josparlaǵan.

– Operator bolamyn dep barǵan edim, biraq akter bolyp shyqtyq. Sol jerde akterlik bólimdi támamdap júrgen, Aqkenje Álimjan degen aktrısa kezdesip, «Sen akter bolatyn jigitsiń» dep Nurqanat aǵaıdyń sheberhanasyna ertip ákeldi, – dep qorytyndylady Qazaqstannyń eńbek sińirgen qaıratkeri.

Aıta keteıik, Almatyda Muhtar Áýezov atyndaǵy teatrdyń 100 maýsymy ashyldy.

Sonymen qatar Ekibastuzda alǵashqy kásibı teatr ashyldy.

Qyzylorda teatry halyqaralyq festıvaldiń altyn júldesin ıelengen edi.