Kınoteatrdaǵy otandyq kınolar Gollıvýd fılmderin qýyp jetti - Nurlan Qoıanbaev
NUR-SULTAN. QazAqparat - Qazaqstandyq kınoprodıýser Nurlan Qoıanbaev Astana Media Week aptalyǵynda qazaqstandyq kınotýyndylardy kórsetý jóninde baıandady, dep habarlaıdy QazAqparat tilshisi.
«Kıno salasynda jumys istep jatqanymyzǵa 4 jyl bolǵan joq, bul aralyqta kishigirim 3 kıno túsirdik. Qazaqstandyq kórermenniń otandyq kınoǵa degen qyzyǵýshylyǵy ósip jatyr. Sońǵy eki jylda qazaqstandyq kınolar kórý jaǵynan Gollıvýd kınolaryn qýyp jetti dep aıtýǵa bolady. Qazaqstan kınoteatrlarynan kórsetilgen úzdik 5 kınonyń qataryna 2 qazaqstandyq kıno endi. «Bıznes po kazahskıı» fılminiń kassalyq túsimi 2 mln dollar tabys tapty. Ony eń úzdik dep otyrǵan joqpyn. Biraq, bul - kınoteatr túsimindegi qazaqstandyq kınonyń jeńisi», - dedi N. Qoıanbaev «Qazaqstandaǵy kıno men serıaldy damytý» paneldik sessııasynda.
Sonymen birge, prodıýser Úkimet tarapynan óner men kınony qoldaýdyń mańyzdylyǵyn atap ótti.
«Bıznes po kazahskıı» fılminiń kezekti shyǵarylymyn Koreıada túsirip keldik. Ondaǵy áriptestermen sóıleskende, Koreıa memleketi áli kúnge deıin jeke kompanııalarǵa kómektesip jatqanyn aıtty. Nátıjesin de kórip otyrsyzdar, Ońtústik Koreıanyń telehıkaıasy, kınosy, mádenıeti búkil álemge taraldy», - dedi ol.
Aıta keteıik, elordadaǵy «Qazmedıa» ortalyǵynda úsh kúnge sozylatyn Ortalyq Azııadaǵy eń iri medıa-oqıǵa — Astana Media Week bastaldy.
Onda Aqparat jáne qoǵamdyq damý mınıstri Dáýren Abaev otandyq serıal óndirýshilerge salyq jeńildigi týraly aıtty.
