Kınoteatr, OSO, teatr, kórmeniń bári jabyq – elordada karantın tártibi kúshinde qalady
NUR-SULTAN. QazAqparat – Qazaqstanda tótenshe jaǵdaı rejımi toqtaǵanymen, astanada buryn engizilgen karantın tártibi kúshinde qalady. Nur-Sultan qalasy ákiminiń orynbasary Baqtııar Máken osylaı dep málimdedi, dep habarlaıdy QazAqparat tilshisi.
«Osy ýaqytqa deıin elordada 97 nysan karantınge jabylǵan bolatyn. Qazirgi ýaqytta olardyń 67-nen karantın tártibi alynyp tastaldy. 30-y áli qala beredi. Búginnen bastap memlekettik bas sanıtarlyq dárigerdiń qaýlysy kúshine enedi. Sondyqtan nysandardyń birazynan aldaǵy ýaqytta karantın tártibi alynyp tastalady. Alaıda olardyń bárine de monıtorıng júrgizilip otyrady», - dedi Baqtııar Máken OKQ-da ótken baspasóz máslıhatynda.
Nur-Sultan qalasy ákiminiń orynbasary búginge deıin elordada 40 myń PTR test, 24 myń ekspres testileý júrgizilgenin málim etti. Kún saıyn qalada 3 myń test júrgiziledi. Sonymen qatar qalada aldaǵy ýaqytta kúnine 1 myń test júrgiziletin laborotorııa jasaqtalady.
«Búgingi tańda el aýmaǵynda tótenshe jaǵdaı rejımi toqtatylddy. Alaıda elordada koronavırýs juqtyrý qaýpi áli saqtalyp tur. Sol sebepti buryn engizilgen shekteý sharalary kúshinde qalady. Burynǵysha sporttyq, kóńil kóteretin, buqaralyq, otbasylyq sharalardy ótkizýge tyıym salynady. Oıyn-saýyq ortalyqtary, kınoteatrlar, tearlar men kórmeler, adamdar jınalatyn basqa da nysandar áli de ashylmaıdy. Dinı nysandardyń jumys bastaýyna da áli bolmaıdy. Epıdemııa azaıǵannan keıin ǵana biz bul máselelerdi qaıta qaraımyz», - dedi ol.
