Kınosúıer oqyrmanǵa arnalǵan qazaq tildi saıt ashyldy

Keshe Almatyda jańa portaldyń tanystyrylymy ótti.

Saıttyń ákimshisi Ernar Bekenovtyń aıtýynsha, saıtta kıno álemi týraly jańalyqtar, premeralar, retsenzııalar, sholý, taldaýlar berilip turady. Sondaı-aq qazaqstandyq jáne kıno áleminiń juldyzdary týraly turaqty túrde aqparattar, suhbattar da saıt betinen oryn almaq. «Túsirilim oryndarynan sýretter, beınekórinister, reportajdar jasaýdy da kózdep otyrmyz. Sondaı-aq akterler men rejısserler, fılmderdiń reıtıngterin jasaıtyn bolamyz»,- deıdi E.Bekenov.

Saıt avtorlarynyń biri Dinmuhamed Zııadınniń aıtýynsha, saıtty ashýdaǵy maqsat - qazaq tilinde kıno salasy týraly tolyqqandy aqparat berý.

«Elde kınoóndiriske arnalǵan resýrstar bolǵanymen, qazaq tilindegi osy salany tolyqqandy qamtıtyn saıt joqtyń qasy. Al sońǵy kezde qazaq kınosynyń damý úrdisin eskersek jáne memlekettik tildi qoldanýshylar sanynyń ınternet-keńistikte artyp jatqanyna nazar aýdarsaq, mundaı ınternet-jobanyń qajet ekendigi baıqalady. Kinostan.kz tek kınoǵa arnalǵan portal bolady. Elimizdegi kınoteatrlardyń kestesi beriledi. Saıt qoldanýshylary arasynda túrli saýalnamalar uıymdastyrý josparda bar»,-deıdi D.Zııadın.