Kınorejısser Ardaq Ámirqulov ómirden ótti
ASTANA. KAZINFORM – Mádenıet jáne aqparat mınıstrligi kórnekti kınorejısser Ardaq Ámirqulovtyń dúnıeden ótýine baılanysty týǵan-týystary men jaqyndaryna, áriptesterine, shákirtterine jáne barsha kınosúıer qaýymǵa qaıǵyra kóńil aıtty.
Ulttyq kıno ónerin damytýǵa sanaly ǵumyryn arnaǵan Ardaq Jamansaryuly qazaq kınematografııasynyń órkendeýine ólsheýsiz úles qosty. Daryndy rejısser, bilikti ustaz ári tálimger retinde birneshe býyn kınogerlerdiń qalyptasýyna yqpal etti.
Ardaq Ámirqulovtyń «Otyrardyń kúıreýi», «Abaı», «Qosh bol, Gúlsary!» jáne ózge de fılmderi ulttyq kıno óneriniń altyn qorynan oryn aldy. Onyń shyǵarmalary el tarıhyn, halyqtyń rýhanı qundylyqtaryn jáne adam taǵdyryn tereń beıneleýimen erekshelenip, kórermen qaýym men kásibı ortanyń joǵary baǵasyna ıe boldy.
– Ardaq Jamansaryulynyń jarqyn beınesi, ónegeli ǵumyry men qazaq mádenıeti men kıno óneriniń damýyna sińirgen eleýli eńbegi halyq jadynda máńgi saqtalady, - delingen mınıstrlik jazbasynda.
Halyq qaharmany, soǵys jáne eńbek ardageri Ivan Gapıch 104 jasqa qaraǵan shaǵynda ómirden ozǵanyn jazǵan edik.
