Kınoprokat naryǵyn qadaǵalaý úshin zańnamany kúsheıtý jumysy bastaldy

ASTANA. KAZINFORM – Mádenıet jáne aqparat mınıstrligi kınoprokat naryǵyn qadaǵalaý úshin zańnamany kúsheıtý jumysyn bastady.

- Memleket basshysynyń 2025 jylǵy 14 naýryzda Býrabaıda ótken Ulttyq quryltaıda bergen tapsyrmasyn oryndaý maqsatynda mınıstrlik elimizdegi kınoprokat naryǵyn qadaǵalaý úshin zańnamany kúsheıtý boıynsha tıisti jumystardy bastady. Atap aıtqanda, Parlament depýtattarynyń bastamasymen «Kınematografııa týraly» Qazaqstan Respýblıkasynyń Zańyna ózgerister engizý josparlanǵan. Onyń ishinde fılmge prokattaý kýáligin bermes buryn fılmdi aldyn-ala kórý, sondaı-aq fılmdi aldyn ala kórýdi júzege asyratyn tıisti saraptama komıssııasyn qurý máselesi qolǵa alyndy, - dep atap ótedi mınıstrilikten agenttik saýalyna oraı.

Mınıstrlik Zańǵa ózgerister engizilip, atalǵan normalar óz kúshine engen soń fılmder qatań súzgiden ótkizilip, kınoprokatqa barynsha sapaly kontent shyǵatynyna senim bildiredi.

Aıta keteıik, osy jyldyń naýryzynda Býrabaıda ótken Ulttyq quryltaıdyń 4-otyrysynda Memleket basshysy Qasym-Jomart Toqaev kınoteatrda kórsetiletin fılmderge qatysty qoǵamdyq syn bar ekenin aıtqan bolatyn. 

- Byltyr qazaqstandyq mamandar túsirgen 94 fılm shyqqan, ıaǵnı negizinen ózimizdiń ónim shyǵarylyp jatyr. Bul – jaqsy úrdis. Biraq biz, eń aldymen sanǵa emes, sapaǵa kóńil aýdarýymyz kerek. Kórermenniń kóńilin kóterip, kúlki syılaý – bir bólek, jaǵymsyz ádetterdi nasıhattaý – bir basqa. Zorlyq-zombylyqty, qatygezdik pen qylmysty nasıhattaıtyn fılmder de paıda boldy. Osy jerde bir nárseni eskergen jón. Búginde fılmderdiń basym kópshiligi memlekettik tapsyryspen emes, jeke qarjyǵa túsirilýde. Kıno mańyzdy ıdeologııalyq qural ekenin bárimiz jaqsy túsinemiz. Sondyqtan jeke qarjyǵa túsirilse de, fılmdi kınoteatrlarǵa shyǵarmas buryn aldyn ala saraptaýdan ótkizý joldaryn qarastyrǵan jón, - degen edi Prezıdent.