Kınopremeralar: elimizdiń kınoteatrlarynda ne kórýge bolady
Apta saıyn kınokórermen jańa premerany asyǵa kútedi. Taıaý kúnderi qandaı fılmder usynylatynyn Kazinform agenttiliginiń tilshisi anyqtap bildi.
«STRANGER»
Ánshi Dımash Qudaıbergenniń Astanada ótken kontsertin qazaqstandyqtar endi kınoteatrdan tamashalaı alady. Sol kezdegi kontsertke 40 myń kórermen jınaldy. Onyń 10 myńnan astamy álemniń ár túkpirinen kelgen jankúıer. Kórermen umytylmas kúndegi biregeı shoýǵa negizdelgen mýzykalyq fılmdi úlken ekrannan tamashalaýǵa múmkindik aldy.
«Ostrov. Umytylmas saıahat»
Qazaqstandyq komedııa Jomart pen onyń seriktesi jaıly. Oqıǵa Taılandta órbıdi. Onyń mindeti asa iri kólemde memleket qarjysyn jymqyrǵan qurylys kompanııasynyń burynǵy dırektoryn jazaǵa tartý. Burynǵy basshyny tabý ońaıǵa soqqan joq. Basty keıipkerdi kóp kedergi kútip tur. Ýly jándikten bastap jergilikti basbuzarlarǵa da kezigedi.
«Karate-bala: Ańyzdar»
Djekı Chan túsken sporttyq kıno kýng-fý jarysynda jeńiske jetken amerıkalyq bala men oǵan kómektesken qart sheber jaıly.
«Fınıkıı syzbasy»
Benısıo Del Toronyń basynan keshken oqıǵalaryn kórýge bolady. Munda ákesi men qyzynyń otbasylyq bıznestegi qupııasy, tyńshylyq týraly baıandalady. Sıýjeti qupııaǵa toly ári tosyn jaıt arbap alady.
«Jelden júırik»
Eýropalyq sporttyq dramada kólikpen jarysatyn Maks týraly baıandalady. Ol birde sporttan ketip, ózge jumysty tańdaıdy. Alaıda taǵdyr ol qyzdy akademııaǵa túsýge kómektesetin, álemniń úzdik sportshylaryn daıyndaıtyn kólik júrgizýshisine keziktiredi. Maks mektepte Ýıllmen tanysyp, áp sátte ekeýiniń arasynda sezim oty tutanady. «Formýla 1» chempıony ataǵyna tym jaqyn qalǵanda Ýıll kútpegen básekelesi atanady. Makstyń sheshimi qalaı bolady? Ol mahabbatty álde jeńisti tańdaýy tıis.
«Denıstiń áńgimeleri»
Jez keldi, Denıs Korablev úshin túrli hıkaıaǵa toly shaq bastaldy. Ájesi bastaǵan top úsh aı demalysty saıajaıda, taza aýada ótkizýge sheshim qabyldaıdy. Sol kezde Denıs jańa dostar tabady, alǵash ret ǵashyq bolady. Sol sátte mahabbat hıkaıasy bastalady.
«Jazalaý oıyny»
Bul Robert De Nıro týraly amerıkandyq kıno. Bokýshı qamal salyp, onyń ishin qarý-jaraqqa toltyrady. Úkimet bolsa sol uıymǵa kirip, onyń josparyn bilmekke túrli amal oılaıdy. Birneshe ret oqtalǵanymen, nátıje bolmady. Sol kezde burynǵy arnaıy jasaq Nesh Kavanoǵa usynys beredi. Ol Bokýshıdiń shákirti. Nesh Kavano bir kezderi súıiktisin tartyp alǵan adamnan kek alar shaqtyń kelgenin kórip, kelisedi.