Kınopremeralar: kınoteatrlarda qandaı fılmder kórsetiledi
ASTANA. KAZINFORM – Ár aptada kórermendi jańa premera kútedi. Kazinform agenttiginiń tilshisi taıaý kúnderi qandaı fılmder qaraýǵa bolatynyn usynady.
Qolyńnan kelse alyp qash
Qazaqstandyq komedııada óte ashyq, aqkóńil, jetistikke jetken 35 jastaǵy Samal esimdi qyz týraly baıandalǵan. Tabysty bolsa da ol turmysqa shyǵýǵa asyqpaıdy. Ári óte yrymshyl jáne anasyna qaraǵanda Roza esimdi kóripkelge jıi barady. Birde Roza Samalǵa bolashaq jubaıy týraly belgi bolatynyn aıtady. Eger ol sol adamdy izdep taýyp, turmysqa shyqpasa, ómirde baqytsyz bolady-mys. Kóripkeldiń aıtqanyna sengen Samal óziniń qurbysy ári burynǵy sportshy Sezimge jáne astrologııany serik etken Katıaǵa aıtyp, taǵdyryna jazylǵan er adamdy izdeýge attanady.
ADAM: Nartáýekel
Toqtar ákesin izdeýge, ata-anasynan kóz jazyp qalǵan balalarmen tanysýǵa ózge ǵalamsharǵa attanady. Olar Tým esimdi bıleýshige qarsy kúres júrgizedi. Alaıda Tým onyń ákesiniń estelikterin túgel joıyp, oń qoly etip alǵan. Toqtar áke júregin jibite ala ma álde ákesi sol kúıi zulymdyqtyń qushaǵynda qalama ma?
Dıspetcher
Tom úlken korporatsııa men úkimet qurylymdarynyń shyrmaýynda qalǵan adamdarǵa kómektesetin mamandyq ıesi. Máselen qupııa qujattardy jarııalamaq bolǵan Sara ózin ańdyp júrgen adamdardyń quryǵyna túsip qalady. Sara qatań erejeni saqtap qana aman qala alady.
Bir bútin
Psıhologııalyq horror adamdar arasyndaǵy qarym-qatynasty sýretteıdi. Qala syrtyndaǵy úıge ornalasqan erli-zaıypty ǵajaıyp bir kúıge enip, ómiri ózgere bastaıdy. Ekeýdiń arasyndaǵy mahabbat ta jańa kúıge enedi. Olardyń táni de jańarady.
Jupar ańqyǵan júrek
Qazaqstandyq psıhologııalyq drama. Áıel ozbyr kúıeýin jaqsy kóredi, oǵan kónedi. Al balada tańdaý joq. Júrek transplantatsııasynan keıin er adam ózgere bastaıdy. Bul jalǵyz ulynyń júrek soǵysyn estýge sheshim qabyldaǵan qarııalardyń qamqorlyǵynan, meıiriminen álde ózine salynǵan jańa júrektiń áserinen bolýy múmkin.
Ol «Iá» dedi
Brıtandyq dramedııa. Úsh apaly-sińliniń biri Ketrın karera qýǵan tabysty, ekinshisi Vıktorııa óte sulý, al úshinshisi Djordjına óte sypaıy ári tuıyq. Úsheýi týǵan qalasyna oralady. Sebebi olardyń anasy taǵy da «Iá!» dep aıtyp, turmysqa shyǵyp jatyr. Týǵan jerde olardy kúptegen qonaqtar, túrli qupııa men taǵdyrsheshti ózgerister kútip tur. Toı qalaı aıaqtalady?
Soqyr qylysh
Chenniń kózi kórmeıdi, sonda da ol urys ádisterin sheber meńgergen ańyz jaýynger. Onyń tabysy — qaýipti qashqyndardy izdep tabý, ustaý. Birde soqyr Chen otbasy kóz aldynda kóz jumǵan 9 jastaǵy Chjan Sıaoıýıdi qutqarady. Bir keremettiń arqasynda tiri qalǵan Chjan Sıaoıýı Chenniń kelesi tapsyrmasyna ere barady. Sóıtip sheber Sıaoıýıdiń ustazyna aınalady. Ol otbasynan aıyrǵan adamdardan kek alýǵa kómektesý úshin qyzǵa urys ádisterin úıretedi.
Mıssııa: Emtıhan baǵasyn ózgertý
Ted — prank jasaýdyń sheberi. Ol prank jasaıtyn kezde dron, naıza men qurylys kóbigin de paıdalanady. Mekteptegi dostarymen birge emtıhannan qulap qalǵanyn bilgen kezde bári bir maqsatqa jumylady. Sóıtip emtıhandaǵy baǵany ózgertýge sheshim qabyldaıdy. Biraq bári olar josparlaǵandaı bola bermeıdi.