«Kınoparkte» qyz balany soqqyǵa jyqqan azamattyń isi prokýratýranyń qadaǵalaýynda - J. Asanov
ASTANA. QazAqparat - Astanadaǵy «Kınoparkte» qyz balany soqqyǵa jyqqan azamattyń isi prokýratýranyń qadaǵalaýynda. Búgin Májilistiń jalpy otyrysy arasynda jýrnalısterge bergen suhbatynda Bas prokýror orynbasary Jaqyp Asanov Astanadaǵy «Kınopark» kınoteatr jelisiniń birinde oryn alǵan oqıǵaǵa qatysty túsinik berdi.
«Astanadaǵy «Kınopark» kınoteatrynyń aýmaǵynda qyz balany soqqyǵa jyqqan fakti týraly sotqa deıingi tergeý sharalary atqarylýda. Meniń bilýimshe, bul materıal sotqa deıingi tergeýlerdiń biryńǵaı reestrine tirkelgen. Sondyqtan da, bul is basqa da qylmystyq ister sekildi Bas prokýratýranyń erekshe qadaǵalaýynda bolady. Jalpy kez kelgen qylmystyq is prokýrorlardyń nazarynan tys qalmaıdy», - dep túsindirdi Jaqyp Asanov.
Eske sala keteıik, jaqynda áleýmettik jelide jurtty dúr silkindirgen vıdeo paıda bolǵan edi. Onda Astanadaǵy «Kınopark» kınoteatryna kelýshilerdiń biri kassır qyzben sózge kelip, keıinnen qyzdy ishinen teýip, soqqyǵa jyǵady. Mekemeniń resmı paraqshasynda habarlanǵanyndaı, oqıǵaǵa qatysty aryz Astana qalalyq Esil aýdanynyń ІІB-na jiberilgen. Bul oqıǵa qoǵamda úlken rezonans týdyrýda.
