Kınologııadaǵy únsiz seriktestik: Býcha men Raqymjannyń senimge qurylǵan dýeti
ATYRAÝ. KAZINFORM — Qoǵamdyq qaýipsizdikti qamtamasyz etýde Atyraý oblysy polıtsııa departamentiniń kınologııalyq qyzmet ortalyǵynda jarylǵysh zattardy izdeý baǵyty boıynsha qyzmet etetin Býcha esimdi ıisshil ıttiń róli erekshe.
Býcha — qarapaıym úı janýary emes, arnaıy daıyndyqtan ótken kásibı ıisshil ıt. Onyń mindeti — qoǵamdyq oryndarda, strategııalyq nysandarda jáne iri is-sharalar ótetin aýmaqtarda jarylǵysh zattardyń bar-joǵyn anyqtaý. Bul jumys syrt kózge qarapaıym kóringenimen, shyn máninde asa joǵary dáldik pen tózimdilikti talap etedi.
Býchanyń basty «ereksheligi» — erekshe damyǵan ıis sezý qabileti. Ol kúdikti zatty tapqan sátte abyr-sabyr týdyrmaıdy, úrmeıdi, júgirmeıdi. Kerisinshe, arnaıy belgi berý arqyly baptaýshysyna tynysh túrde habarlaıdy. Bul — arnaıy kınologııalyq daıarlyqtyń eń mańyzdy qaǵıdalarynyń biri.
Býcha qyzmettik tájirıbesinde birneshe mańyzdy nátıjege qol jetkizgen.
2026 jylǵy aqpan aıynda Atyraý qalasynda esirtki zattaryn zańsyz tasymaldaýǵa qatysy bar kúdikti ustalǵan kezde, tekserý barysynda ıisshil-izdestirý ıtiniń kómegimen jasyrylǵan esirtki zattary anyqtalyp, aınalymnan alyndy.
2024 jyly Astana qalasynda júrgizilgen jedel-profılaktıkalyq is-shara barysynda avtokólikterdiń birin tekserý kezinde Býchanyń kómegimen oq-dáriler tabylyp, zańsyz saqtalǵan qarý-jaraq elementteri tárkilendi.
Tórt aıaqty tártip saqshysynyń árbir qadamy onyń baptaýshysy — Atyraý oblysy polıtsııa departamenti kınologııalyq qyzmet ortalyǵynyń ınspektor-kınology Raqymjan Erbolatpen tyǵyz baılanysty. Ekeýiniń arasyndaǵy qarym-qatynas buıryq pen oryndaýdan áldeqaıda tereń — bul senim men ıntýıtsııaǵa negizdelgen seriktestik.
— Iisshil ıtpen jumys isteý tek úıretý emes. Bul — kúndelikti eńbek, psıhologııany túsiný, minezin taný. Ýaqyt óte kele arada erekshe baılanys qalyptasady. Býcha — men úshin jaı ıt emes, senimdi serik, — deıdi Raqymjan Erbolat.
Kınologtyń aıtýynsha, jarylǵysh zattardy izdeý — eń jaýapty baǵyttardyń biri. Óıtkeni kez kelgen usaq qatelik úlken qaýipke ákelýi múmkin. Sondyqtan munda qyraǵylyq, tártip jáne úzdiksiz jattyǵý basty talap bolyp sanalady.
Seriktestiktiń tabysy — adam men ıt arasyndaǵy senim deńgeıine tikeleı baılanysty. Býcha men Raqymjan arasyndaǵy úılesim ýaqyt óte kele kásibı deńgeıden de joǵary túsinistikke aınalǵan.
Búginde bul qos serik óńirdiń qoǵamdyq qaýipsizdigin qamtamasyz etýge kún saıyn úles qosyp keledi. Kópshilikke kórine bermeıtin bul eńbek — beıbit ómirdiń únsiz qorǵany.
Mamandardyń aıtýynsha, kınologııalyq qyzmet — quqyq qorǵaý júıesindegi eń kúrdeli ári jaýapty baǵyttardyń biri. Munda tek daıyndyq emes, ishki sezim, senim jáne sheksiz adaldyq sheshýshi ról atqarady.
Buǵan deıin aqtóbelik kınolog Mahambet Abdýalıev ıt pen kınologtyń minezi bir-birine uqsamaýy tıis ekenin aıtqan edi.
