Kınolog áıel: Bul jumysqa ıtterge degen mahabbatym ákeldi
ÓSKEMEN. KAZINFORM – Shyǵys Qazaqstan oblysynda kınolog bolyp jumys isteıtin Marına Tsýkanova talaı adamdy qutqaryp qalǵan kánigi maman.
Marına Tsýkanova ShQO TJD jedel-qutqarý jasaǵynda kınolog bolyp qyzmet etedi. Onyń aınymas serigi – labrador Vılson. Olar birge 9 jyl boıy qaýipsizdikti qamtamasyz etip kele jatyr.
- Meni bul jumysqa ıtterge degen mahabbatym ákeldi. Ózimdi basqa salada elestete almaımyn. Sondyqtan jumysty bar qulshynyspen isteımin, - deıdi Marına.
Ol Vılson ekeýi túrli qutqarý operatsııalaryna qatysady. Sondaı kezderde kınologtar men ıtter adam ómirin ajaldan arashalap ta jatady. Máselen, qıraǵan ǵımarattyń myńdaǵan bólshekteriniń arasynda izdeý jumystaryn júrgizý ońaı sharýa emes. Ondaıda ıtter zardap shekkenderdi adamǵa qaraǵanda áldeqaıda tez taýyp, qutqarýshylarǵa durys joldy meńzeıdi.
Marına Tsýkanova qutqarýshy ǵana emes, úsh balanyń anasy. Ol balalaryn da tárbıelep, úı janýarlaryn da úıretip júr.
- Qys kezinde balalarmen tabıǵatqa shyǵyp, shańǵy tepkendi jaqsy kóremiz. Ózimizben birge úı janýarlaryn da alyp baramyz. Balalar ıtterdi jegip shana tebedi. Osylaı keremet emotsııa alyp, demalyp qalamyz. Ári ıtterge bul fızıkalyq jattyǵý, - deıdi kınolog.
Qazir Marına men Vılsonnyń jumys tobyna aq shveıtsarlyq ovcharka qosyldy. Ol ekeýine tótenshe jaǵdaılar kezinde qolǵabys bolatyn taǵy bir kómekshi.
- Ózim jaqsy kóretin isimmen aınalysatyndyqtan shyn baqyttymyn. Attestatsııa kezinde únemi tapsyratyn normatıvter, aýyr sómkeni arqaǵa asyp júrý, ár túrli jıyndar – maǵan aýyrtpalyq salmaıdy. Bul jerde áıel nemese er adam dep bóliný joq, bárimiz de qutqarýshymyz!, - deıdi Marına Tsýkanova.
Osyǵan deıin elimizdiń aımaqtarynda qarǵa ombyǵyp jolda qalǵan 33 adamnyń qutqarylǵanyn jazdyq.