Kınoındýstrııa salasyn memlekettik qoldaýdyń jańa tetikteri ázirlenip jatyr

ASTANA. KAZINFORM – Kınoındýstrııa salasyn memlekettik qoldaýdyń jańa tetikteri ázirlenip jatyr. Bul jaıynda Senat depýtattarynyń saýalyna Premer-Mınıstr Oljas Bektenovtiń jaýabynda aıtylǵan.

«Memleket basshysynyń kınematografııa salasyn reformalaý boıynsha bergen tapsyrmasyn oryndaý maqsatynda Úkimet «Kınematografııa týraly» Zańǵa túzetýler engizý jáne kınoındýstrııa salasyn memlekettik qoldaýdyń jańa mehanızmin ázirleý jumystaryn júrgizip jatyr. Engiziletin túzetýlerdiń qatarynda balalar anımatsııalyq fılmderi men otbasymen kórýge arnalǵan qazaq tilindegi fılmder sanyn ulǵaıtý boıynsha normalar qarastyrylǵan. Tıisti zań jobasy Qazaqstan Respýblıkasy Parlamenti Májilisiniń qaraýynda», - dep atap ótedi Úkimet basshysy.

Premer-Mınıstr Úkimettiń qaýlysymen bekitilgen Qazaqstan mádenı saıasatynyń 2023-2029 jyldarǵa arnalǵan tujyrymdamasy iske asyrylyp jatqanyn atap ótedi. Onda otandyq fılmderdiń, onyń ishinde anımatsııalyq fılmderdiń kınoprokat úlesin 2022 jylǵy deńgeıden 2030 jyly 35 paıyzǵa deıin arttyrý (2023 jyly – 18 %, 2024 jyly – 21 %, 2025 jyly – 25 %, 2026 jyly – 28 %, 2027 jyly – 30 %, 2028 jyly – 32 %, 2029 jyly – 35 %) nysanaly ındıkatory kózdelgen.

«Anımatsııalyq fılmder óndirisi «Kınematografııa týraly» Zańnyń negizinde (fılmderdi irikteý jáne qarjylandyrý qaǵıdalary) retteledi. ıAǵnı, anımatsııalyq óner qurylymy atalǵan Zańda keńinen qarastyrylǵan», - dedi Oljas Bektenov.