Kınogerler Álııa Moldaǵulova týraly kórkem fılmge bas keıipker izdeıdi
ALMATY. KAZINFORM – Qazaqstandyq kınogerler qazaqtyń qaharman qyzy Álııa Moldaǵulova týraly «Álııa» atty jańa kórkem fılmdi túsirýge daıyndalyp jatyr.
Á. Moldaǵulovanyń 100 jyldyǵyna jáne Jeńistiń 80 jyldyǵyna arnalǵan «Álııa» tolyqmetrajdy kórkem fılmi 2025 jyldyń mamyr aıynda jaryqqa shyǵady.
«Álııa» fılminiń stsenarıin máskeýlik jýrnalıst, telejúrgizýshi ári aktrısa Alena Kýleshova jazdy.
Jobanyń bas prodıýseri jáne stsenarısteriniń biri Aleksandr Shýhov fılm túsirý ıdeıasy 2019 jyly paıda bolǵanyn atap ótti.
«Qazaqtyń batyr qyzy Álııa Moldaǵulova Ekinshi dúnıejúzilik soǵysqa attanǵanda jasósipirim boldy. Qolyna qarý alyp, mergendik tanytqan ol 78 jaý áskeriniń kózin joıyp, Keńes Odaǵynyń batyry ataǵyn aldy. Bul oqıǵa máskeýlik jýrnalıst, telejúrgizýshi jáne aktrısa Alena Kýleshovany baýrap alǵany sonshalyq, ómiriniń úsh jylyn bıopıktiń stsenarııin jazýǵa arnady. Mıfter men ańyzdardan bas tartyp, Alena ómirdiń shynaıy shyndyǵyn izdedi. Ol Álııany jaqsy biletin adamdardy taýyp, olarmen áńgimelesti», - dedi Aleksandr Shýhov.
Onyń aıtýynsha, bul qymbat jobaǵa 900 mln teńgeden astam qarajat jumsalady dep josparlaǵan.
Fılm Qazaqstanda túsiriledi. Belarýs elinde de ótýi múmkin.
«Álııa» fılminiń rejıssery — Alen Nııazbekov. Ol kópshilikke «Kanıkýly v Taılande», «Moıa bolshaıa kazahskaıa semıa», «Agashkı po vyzový», «Almaty, ıa lıýblıý tebıa» fılmderi arqyly tanymal.
«Álııa» kartınasynyń prodıýserleri fılmdi jas maman túsirý kerek degen sheshim qabyldaǵan.
«Biz tek senimdi, sarapshylar rastaıtyn jáne moıyndaıtyn faktilerdi qoldanýdy maqsat ettik. Máskeý áskerı muraǵattaryndaǵy jumys nátıjesinde dramalyq materıal úshin dáleldengen negiz jınaldy», - deıdi rejısser.
Onyń sózinshe, fılmge psıhologııalyq áskerı dramanyń janry tańdaldy, erlikke barǵan keıipkerdiń motıvatsııasy ashylady. Jekpe-jek kórinisteri birte-birte lentanyń emotsıonaldy qarqyndylyǵyn kúsheıtý arqyly, keń aýdıtorııaǵa fılmniń tartymdylyǵyn qamtamasyz etedi.
«Álııa Moldaǵulova degende oıǵa birden Ekinshi dúnıejúzilik soǵys oralady. Biraq bul fılm soǵys týraly emes, Álııa týraly. Onyń balalyq shaǵy, eseıý, jastyq shaǵy baıandalady», - deıdi Alen Nııazbekov.
9 mamyrda jalpyulttyq kastıng bastalady. Shyǵarmashylyq top basty rólde oınaıtyn aktrısany Qazaqstan turǵyndary arasynan izdeıdi.
«Biz stsenarıımen tanystyq. Álııanyń obrazyn ashatyn 15-16 jastaǵy, boıy 150-155 sm bolatyn qazaq qyzyn áli tappadyq, búkil Qazaqstan boıynsha keń aýqymdy ashyq kastıng jarııalaımyz», - dedi kastıng dırektory Gúlzýra Esen.
Túsirilim kúzde bastalyp, qysta aıaqtalady.