Kınoǵa 6,2 mlrd teńge bólindi: jyl sońyna deıin qandaı fılmder prokatqa shyǵady
ASTANA. KAZINFORM – Qazaqstanda jyl basynan beri memlekettik qoldaýdyń arqasynda bes kórkem fılmniń óndirisi aıaqtaldy. Jyl sońyna deıin taǵy 17 kınojobany aıaqtaý josparlanyp otyr. Bul týraly Mádenıet jáne aqparat mınıstrligi Kazinform agenttiginiń resmı saýalyna bergen jaýabynda málimdedi.
– 2025 jyly Kıno ortalyǵyna memlekettik qarjylaı qoldaý kórsetýge 2,6 mlrd teńge, al 2026 jyly 3,6 mlrd teńge bólindi, – delingen vedomstvo jaýabynda.
2024 jáne 2025 jyldardaǵy konkýrstyq irikteý qorytyndysy boıynsha tańdalǵan kınojobalardy óndirýge Kıno ortalyǵyna 2,5 mlrd teńge berilgen.
Qazir 20 kınojoba óndiris ústinde. Onyń 17-sin 2026 jyldyń sońyna deıin aıaqtaý josparlanǵan. Olardyń qatarynda 12 kórkem fılm, 1 qysqametrajdy fılm, 3 anımatsııalyq týyndy jáne 1 derekti fılm bar.
Al 2025 jyly 7 kınojobanyń óndirisi aıaqtalǵan. Onyń ishinde 1 kórkem, 3 derekti jáne 3 anımatsııalyq fılm bar. 2026 jyldyń qańtar-tamyz aılarynda memlekettik qoldaýmen bes kórkem fılmniń óndirisi aıaqtaldy.
Al 2025 jyly prokatqa 10 fılm shyqqan. Olar – «Kapıtan Baıtasov», «Igromanka», «Qaitadan», «90+1», «Aromatnoe serdtse», «Tezek», «Joqtau», «Fake-ovyı arman», «Tarlan» jáne «Altyn adam» anımatsııalyq fılmi.
Bıyl qańtar aıynan beri alty fılm kórermenge jol tartty. Atap aıtqanda «Jumaqtan bılet», «Ábil», «Osennıı brız», «Qut», «38. Sońǵy núkte» jáne «Búrkitshi» fılmderi prokatqa shyqty. Sonymen qatar bıyl derekti janrdaǵy «Prıanıkı dlıa ee ottsa, moego pradeda, ee deda» fılmi de kórermen nazaryna usynyldy.
Jyl sońyna deıin memlekettik qoldaýmen túsirilgen taǵy eki týyndyny keń prokatqa shyǵarý josparlanyp otyr. Kórkem janrdaǵy «Mūğalım» fılmi 8 qazanda, al «Alan týraly ańyz» anımatsııalyq fılmi 22 qazanda kórermenge jol tartady.
Ótken aptadaǵy kınopremeralar tizimin osy jerden kóre alasyzdar.
