Kınoaktrısa Samal Eslıamova «Biz Birgemiz» aktsııasyna qatysty

PETROPAVL. QazAqparat – Soltústik Qazaqstan oblysynda Kann kınofestıvaliniń jeńimpazy Samal Eslıamova «Biz Birgemiz» respýblıkalyq aktsııasyn qoldap, nurotandyqtarmen birge múgedek áıelge kómek kórsetti, dep habarlaıdy QazAqparat tilshisi.

«Nur Otan» partııasy SQOF baspasóz qyzmetiniń málimetinshe, eldegi tótenshe jaǵdaıǵa baılanysty partııa ókilderi qoǵamnyń áljýaz toptaryna qoldaý kórsetip jatyr. Bul joly olardyń qataryna tanymal kınoaktrısa Samal Eslámova qosylyp, muqtaj jandarǵa kómekke baǵyttalǵan «Biz Birgemiz» respýblıkalyq aktsııasyna qatysty.

QR eńbek sińirgen mádenıet qaıratkeri Petropavlda turatyn 3-shi toptaǵy múgedek Roza Imaqovanyń páterine bardy.

«Qazir dárihanalarda maskalar men antıseptıkter tapshy, búgin maǵan bul zattardy uzaqqa jetetindeı etip ákeldi. Densaýlyǵyma baılanysty dúkenge shyǵý qıyn, ári ınfektsııa júrip jatqanda tek asa qajet bolǵan jaǵdaıda ǵana dalaǵa shyqqan jón. Qyz-jigitter azyq-túlik te ákelip berdi. Sol úshin uıymdastyrýshylarǵa alǵysym sheksiz. Ári Samal Eslámovamen kezdesip, sóılesip, kóńilim bir kóterilip qaldy», - deıdi Roza Imaqova.

Aktsııaǵa qoldaý bildirgen Samal Eslámova qazirgideı qıyn jaǵdaıda múmkindigi shekteýli adamdarǵa, kóp balaly otbasylarǵa jáne jalǵyzilikti zeınetkerlerge mundaı kómek birinshi kezekte qajet ekendigin aıtady.

«Qazir kóptegen adamdar pandemııaǵa baılanysty jaǵdaıǵa táýeldi boldy. Bizde kóp balaly otbasylar, múgedekter bar, olarǵa kómek qajet. Men osyndaı aktsııaǵa alǵash ret qatysýdamyn, «Nur Otan» partııasy úlken is atqaryp jatyr dep esepteımin. Mundaı qıyn sátte adamdarǵa kómektesý óte mańyzdy. Men de óz úlesimdi qosyp, osyndaı aktsııalarǵa taǵy da qatysýǵa daıynmyn», - dedi aktrısa.

Búgin «Biz Birgemiz» aktsııasy aıasynda «Nur Otan» partııasy men «Jas Otan» jastar qanaty belsendileriniń arasynan shyqqan volonterler búkil óńir boıynsha 700-ge jýyq adamǵa bardy. Olarǵa antıseptıkalyq, gıgıenalyq quraldardy jáne birinshi kezekte qajetti azyq-túlik ónimderin taratty.