Kıno jańalyqtary: otandyq mýltfılm men komedııa
ASTANA. KAZINFORM — Osy aptada kınoteatrlardan otandyq eki jańa týyndyny tamashalaýǵa bolady. Onyń biri — balalarǵa arnalǵan mýltfılm. Al sheteldik fılmder qatarynda qorqynyshty týyndylar men shytyrman oqıǵaly dramalar bar. Kazinform tilshisi aptadaǵy kınopremeralarǵa sholý jasaıdy.
Kollaj: Kazinform / Kinopoisk.ru
Zamanback 2
Janry: drama, komedııa
Uzaqtyǵy: 90 mınýt
El: Qazaqstan, 2026
Rejısser: Darhan Sárkenov
Azat úshin mahabbat — álsizdik, al otbasy árdaıym ekinshi orynda turatyn. Bir kúni ol kútpegen jerden 1992 jylǵa tap bolady. Sol ýaqyttaǵy ákesiniń jas shaǵymen tanysyp, onyń burynǵy ómiri týraly biledi. Ákesiniń jáne onyń jaqyn dosy Bekıdiń basynan ótken oqıǵalardy zertteı kele, Azat kóp nársege basqasha qaraı bastaıdy. Ótkenge sapary oǵan mahabbattyń, otbasynyń jáne dostyqtyń qadirin uǵyndyrady.
Alan týraly ańyz
Janry: mýltfılm
Uzaqtyǵy: 75 mınýt
El: Qazaqstan, 2026
Rejısser: Azamat Ernazarov
Oqıǵanyń basty keıipkeri — Alan esimdi qar barysy jáne onyń dostary. Olar týǵan qalasyn qorǵaýǵa attanady. Qaýipti saparda basty keıipkerge zulymdyqty jeńýge onyń adal dostary kómektesedi. Mýltfılm meıirimdilik, shynaıy dostyq, týǵan jerge degen súıispenshilik jáne birliktiń kúshi týraly baıandaıdy.
Uıqysyz túnder (Nochı bez sna)
Janry: drama, romantıka
Uzaqtyǵy: 110 mınýt
El: AQSh, 2020
Oleg Boretskıı kınoklýby «Adamǵa adam kerek» taqyrybyn jalǵastyrady. Bul — jan jylýyn izdeý, jalǵyzdyqtan arylý jáne qıyn sátte bireýdiń janynan tabylýdy arqaý etetin hıkaıa. Óıtkeni ár adamǵa shynaıy baqyt syılaıtyn jan serigi kerek.
Kleıfeıs
Janry: ekshn, qorqynyshty fılm, fantastıka
Uzaqtyǵy: 105 mınýt
El: Ulybrıtanııa, AQSh, 2020
Rejısser: Djeıms Ýotkıns
Mett Heıgen — jas akter. Betin aýyr jaraqattaǵannan keıin ol arnaıy em qabyldaýǵa kelisedi. Alaıda ǵylymı tájirıbe kútkendeı nátıje bermeıdi. Kerisinshe, onyń denesi men terisi saz balshyqtaı ıilgish kúıge enedi. Óz bolmysynan, adamdyq qasıetinen aıyrylǵan akter kek alýdy kózdegen qubyjyqqa aınalady.
Umytylǵan aral, (Ostrov zabvenııa)
Janry: shytyrman oqıǵaly komedııa, mýltfılm, fentezı, otbasylyq kıno
Uzaqtyǵy: 98 mınýt
El: AQSh, 2020
Rejısser: Djoel Kroýford, Hanýel Merkado
Eki qurby tylsym Nakalı ǵalamsharynda qamalyp qalady. Úıge qaıtý úshin olar bir-birimen baılanysty barlyq esteligin qurban etýge májbúr bolýy múmkin.
Artqa qaramaı, (Bez oglıadkı)
Janry: komedııa, jol oqıǵalary týraly fılm
Uzaqtyǵy: 81 mınýt
El: Reseı, 2026
Rejısser: Natalııa Konchalovskaıa
Sonıa men Jenıa — kórshi turatyn eki áıel. Bir keleńsiz oqıǵadan keıin olar abaısyzda adam óltirip qoıdyq dep oılap, qashýǵa bel býady. Qaltalarynda aqsha joq, naqty josparlary da joq, kólik júrgizýdi de bilmeıdi. Sapar barysynda ekeýi bul oqıǵasyz-aq óz ómirlerin ózgertkisi kelgenin túsinedi.
Djýmandjı: Qarańǵy deńgeı, (Djýmandjı: Temnyı ýroven)
Janry: qorqynyshty fılm
Uzaqtyǵy: 125 mınýt
El: Taıland, 2026
Rejısser: Chanathıp Vongpoltrı
Bir top bala qaraýsyz qalǵan ǵıbadathanadan kóne ústel oıynyn taýyp alady. Oıyn súıegin laqtyrǵan sátte kekshil rýh bosap shyǵyp, oıyn ólim tuzaǵyna aınalady. Aman qalý úshin balalar oıynnyń qalaı toqtatýǵa bolatynyn tabýy kerek.
Aıaz ata, (Morozko)
Janry: fentezı, otbasylyq fılm
Uzaqtyǵy: 98 mınýt
El: Reseı, 2026
Rejısser: Edýard Bordýkov
Marfa men Nastıa — apaly-sińlili qyzdar. Olar únemi bir-birine qoldaý kórsetedi. Eki qyz aýyldy uzaq jyldar boıy qystan aıyrǵan sıqyrdyń syryn ashýǵa kirisedi. Jolda olar zulym mystanmen betpe-bet kelip, talaı synaqtan ótedi. Aqyry mystandy jeńip, aıaz atanyń kóńilin jibitedi. Sonymen qatar ekeýi de óz baqytyn taýyp, mahabbatqa jolyǵady.
Charlı men Harper, (Charlı ı Harper)
Janry: komedııa, melodrama
Uzaqtyǵy: 102 mınýt
El: AQSh, 2025
Rejısser: Tom Dın, Mak Eldrıdj
Harper men Charlı ómirlerin jańadan bastaý úshin basqa qalaǵa kóshedi. Harper kásibı aspaz bolýdy armandaıdy, al ádebıetke qumar Charlı ómirden óz ornyn taba almaı júredi. Qyz maqsatyna qaraı nyq qadam basqan saıyn, jigiti bir orynda turyp, ózgerýge qaýqarsyz ekenin baıqatady. Soǵan qaramastan, ekeýi de bir-birine laıyq jandar ekenin dáleldeýge tyrysady.
Ǵajaıyp ıÝdo, (Chýdo-ıÝdo)
Janry: shytyrman oqıǵaly fentezı, otbasylyq fılm
Uzaqtyǵy: 105 mınýt
El: Reseı, 2026
Rejısser: Serık Beıseý
ıÝdo — orman sıqyrshysynyń qyzmetshisi. Ol óziniń kim ekenin, qaıdan shyqqanyn bilmeıdi. Biraq qalaǵan sátinde kez kelgen tirshilik ıesine aınala alady. Bul joly oǵan minezi shataq jas sıqyrshy Otradany qorǵaý mindeti júkteledi. Qýatty sıqyrshylar Chernogor men Bolotnıtsanyń qyzy Otrada qarapaıym adamdar álemine qaýipti saparǵa attanady. Kóp uzamaı Chýdo-ıÝdo Otrada úshin kez kelgen iske daıyn ekenin túsinedi. Tipti oǵan eshkim buıryq bermese de, qyzdy qorǵaýǵa bel býady.
Komedı Fransezdegi qarbalas kún, (Bezýmnyı den v Komedı Fransez)
Janry: komedııa
Uzaqtyǵy: 75 mınýt
El: Frantsııa, 2026
Rejısser: Bertran ıÝskla, Marten Darondo
«Komedı Fransez» teatry «Makbet» spektaklin sahnalaýǵa daıyndalady. Alaıda premera kúni bári oıdaǵydaı bolmaı, teatrda naǵyz ábiger bastalady. Jas rejısser Nına men akterler qandaı qıyndyqqa da qaramastan, qoıylymdy sahnaǵa shyǵarýǵa tıis. Óıtkeni teatrdyń bolashaǵy spektakldiń sátti ótýine baılanysty. Teatrdyń sahna syrtyndaǵy beımálim tirshiligin ázilmen jetkizetin bul komedııada Gııom Galenn, Erık Rıýf jáne teatrdyń ózge de tanymal akterleri oınaıdy.
Ótken aptadaǵy kınopremeralar tizimin osy jerden kóre alasyzdar.
