Kıno óndirisi salasyndaǵy qyzmetter jyl ishinde 13,5 paıyzǵa artty
NUR-SULTAN. QazAqparat – Kıno óndirisi salasyndaǵy qyzmetter jyl ishinde 13,5 paıyzǵa artty, dep habarlaıdy QazAqparat tilshisi ranking.kz portalyna silteme jasap.
Osy jyldyń 3 toqsanynyń qorytyndysynda kıno-, vıdeofılmder men televızııa baǵdarlamasy, fonogramma men mýzykalyq jazbalar óndirisi boıynsha qyzmetter 31,7 mlrd teńgeni qurady. Bul ótken jyldyń dál osyndaı kezeńimen salystyrǵanda 19,3 paıyzǵa joǵary. Al shynaıy ósim – 13,5 paıyz. Al ekonomıkanyń baıqalmaıtyn sektoryn esepke almaǵandaǵy qyzmetter kólemi 30,9 mlrd teńge boldy. Jyl ishindegi ósim 17,5 paıyzǵa jetti.
Óńirler sheginde qyzmetterdiń negizgi bóligin Almaty qalasy kórsetti. Bul qalada kórsetilgen qyzmetter 21,9 mlrd teńgege jetti. Sonymen qatar úzdik úshtiktiń qatarynda Nur-Sultan (6,2 mlrd teńge) men Shymkent qalalary (952,9mln teńge) bar.
Sektordaǵy barynsha az kórsetilgen qyzmet Aqtóbe oblysynda kórsetildi. Bul óńirde jyl ishinde kórsetiletin qyzmetter kólemi 1 jyl burynǵy nátıjemen salystyrǵanda 39,5 paıyzǵa qysqaryp, ne bári 6,4 mln teńgeni ǵana qurdy.
Al qyzmetter kóleminiń jyl ishindegi eń joǵary ósimi Aqmola oblysynda tirkeldi. Óńirde qyzmetter kólemi bir jylda 3,2 esege artyp, 57,2 mln teńgege jetti.
Sektorlaǵy barlyq qyzmetterdiń jartysynan kóbin kıno-, vıdeofılmder men televızııalyq baǵdarlamalar alady: 1 jylda 91,3 paıyzǵa artyp, 16,5 mlrd teńge boldy. Kıno-, vıdeofılm men televızııa baǵdarlamalaryn taratýǵa qatysty qyzmetter kólemi 3,1 paıyzǵa ulǵaıyp, 9,2 mln teńgeni quraıdy. Kınofılmder kórsetý qyzmetteri jyl ishinde 21,2 paıyzǵa tómendedi jáne 4,7 mlrd teńge boldy.
