Kıno men teatrda eldiń tutastyǵyna ter tókken handarymyzdyń beınesin shyǵarý bizdiń mindetimiz - Asanáli Áshimov
Bul týraly búgin Astanadaǵy Táýelsizdik saraıynda Qazaq handyǵynyń 550 jyldyq mereıtoıyna arnalǵan saltanatty jıyn barysynda tilshilerge bergen suhbatynda «Qazaqfılm» kınostýdııasynyń jáne M.Áýezov atyndaǵy Qazaq memlekettik akademııalyq drama teatrynyń akteri, rejısser, QR Halyq ártisi Asanáli Áshimov málim etti.
«Barsha Qazaqstan halqyn Qazaq handyǵynyń 550 jyldyq mereıtoıymen quttyqtaımyn! Uly tarıhı tulǵalar búgingi kúndi armandap ketken edi. Táýelsizdik jyldarynda bizdiń býyn ulttyń saqtalýyna ushan-teńiz úles qosqan azamattaryna qurmet kórsetýde jáne búgingi shara sonyń taǵy bir kórinisi. Bul ataýly datany barsha Qazaqstan halqy merekeleýde. Astanada bastaý alǵan merekelik sharalardyń sonymen qatar negizgileri Tarazda jalǵasatyny belgili. Bundaı mańyzdy mereıtoılar óte jaqsy, sebebi eldiń basyn biriktiredi, halyqtyń kóńil-kúıin joǵary kóteredi»,-dedi A. Áshimov.
Osy oraıda tanymal akter jas urpaqty tárbıeleý jolynda árdaıym ótkendi eske alyp turý kerektigin atap ótti.
«Eldiń tutastyǵyna aıanbaı ter tókken handarymyzdyń, batyrlarymyzdyń, azamattarymyzdyń eńbegin baǵalaýǵa erekshe mán bergenimiz durys. Tarıhta, ádebıette, kıno men teatrda olardyń beınesin shyǵarý - bizdiń armanymyz ben mindetimiz. Sondyqtan búgin óner adamdary úshin úlken shabyt beretin kún»,-dep túıindedi óz oıyn A. Áshimov.
