Kıno aptalyǵy: otandyq komedııa jáne álemdik premeralar

ASTANA. KAZINFORM — Osy aptada kınoteatrlar repertýary sheteldik horrorlar men shytyrman oqıǵaly dramalarmen tolyqty. Halyqaralyq deńgeıde tanylǵan akterler men rejısserlerdiń fılmderi kórermen nazaryna usynyldy. Sonymen qatar otandyq jańa týyndy da prokatqa shyqty.

Kıno aptalyǵy
Foto: Kazinform/ JI

Kazinform tilshisi aptadaǵy kıno jańalyqtaryna sholý jasaıdy.

Mahabbat jasqa qaramaıdy

Janry: komedııa

Uzaqtyǵy: 100 mınýt

El: Qazaqstan, 2026

Rejısser: Bahytjan Ýrahaev

35 jastaǵy Erke úshin bıznestiń orny bólek. Onyń kofehanalar jelisinde salyq zańnamasyn buzý derekteri anyqtalady. Kásibin saqtap qalýǵa tyrysqan ol ózinen on jas kishi salyq ınspektorymen jaqyndasýǵa bel býady. Bastapqyda bári eseppen jasalǵan qadam bolǵanymen, ýaqyt óte kele ekeýiniń arasynda shynaıy sezim paıda bolady. Endi Erke qıyn tańdaý aldynda tur: súıikti kásibin saqtap qala ma, álde mahabbatqa jol bere me?

Shybyqtan órilgen kúıeý, (Pletenyı mýj)

Janry: drama, tarıhı fılm, komedııa, melodrama, fentezı, fantastıka

Uzaqtyǵy: 105 mınýt

El: Ulybrıtanııa, AQSh, Avstralııa, 2026

Rejısser: Aleks Hıýston Fısher, Elınor Ýılson

Teńiz jaǵasyndaǵy shaǵyn aýylda jalǵyz balyqshy áıel turady. Kórshileri ony únemi keleke etedi. Jalǵyzdyqtan jalyqqan áıel bir kúni sebet toqıtyn sheberge tal shybyǵynan ózine kúıeý jasap berýin suraıdy. Ýaqyt óte kele ol qoldan jasalǵan kúıeýine baýyr basyp ketedi. Bul jaǵdaı aýyl turǵyndarynyń qyzǵanyshyn oıatyp, el ishindegi tynyshtyqty buzady.

Dıýna

Janry: ekshn, shytyrman oqıǵaly fılm, drama, fantastıka

Uzaqtyǵy: 155 mınýt

El: Kanada, AQSh, Majarstan, 2026

Rejısser: Denı Vılnev

Aýqymdy fantastıkalyq dastan qaıtadan úlken ekranǵa jol tartty! Atreıdes áýletiniń murageri Pol ǵalamdaǵy eń qundy resýrs – melanj óndiriletin Arrakıs shóldi ǵalamsharyna attanady. Alaıda bılik úshin kúres kezinde onyń otbasy úlken qaýipke ushyraıdy. Pol jaýlarynan jasyrynýǵa májbúr bolady. Alda ony talaı synaq, tirshilik úshin kúres jáne taǵdyryndaǵy uly mıssııa kútip tur.

Djınniń hıkaıasy, (Istorııa Djın)

Janry: drama, tarıh

Uzaqtyǵy: 120 mınýt

El: Ulybrıtanııa, AQSh, Germanııa, 2026

Oleg Boretskııtiń kınop klýby «Shynaıy qaharman áıelder» taqyrybyn jalǵastyrady. Olar árdaıym álemdi jaqsy jaqqa ózgertýge úles qosty. Ónerde ólmes týyndylar jasady, ǵylymda jańalyqtar ashty, ıgi isterimen tanyldy. Olar ataq pen dańqqa umtylmady. Kópshiliginiń esimi tarıhta belgisiz kúıinde qaldy.

Navar

Janry: drama, krımınal

Uzaqtyǵy: 85 mınýt

El: Reseı, 2026

Rejısser: Artýr Grıgorev

Shýst pen onyń dostary usaq alaıaqtyqpen aınalysyp, ár jerden paıda tabýdy kózdeıdi. Bir kúni ol ıadro laqtyrýdan KSRO-nyń burynǵy chempıony Ýlıanovpen tanysady. Bul kezdesý Shýsttyń ómirge degen kózqarasyn ózgertedi. Alaıda dostarynyń qysymyna shydamaǵan ol Ýlıanovty paıdalanyp, nefrıt satýmen aınalysatyn býrıat qaýymdastyǵyn tonaýdy josparlaıdy.

Psıhopat áıel, (Psıhopatka)

Janry: komedııa, horror

Uzaqtyǵy: 102 mınýt

El: AQSh, Ulybrıtanııa, 2026

Ýınıfred Nottı ózin álemdegi eń aqyl-esi durys adam sanaıdy. Ol ómirin jańadan bastaýdy uıǵaryp, ońasha ornalasqan eski gotıkalyq ýsadbaǵa kútýshi bolyp jumysqa ornalasady. Onyń mindeti – erke eki balaǵa qaraý. Alaıda kóp uzamaı úı qyzmetshileri birinen soń biri jumbaq jaǵdaıda joǵala bastaıdy. Úı ıeleri de kúdiktene túsedi. Sóıtse, oǵash minezdi Ýınıfred – serııalyq kisi óltirýshi. Ol osy otbasynyń bir múshesi bolý úshin eshteńeden taıynbaıdy

Bet-beınesizder. Djýnglıdegi túnek, (Bezlıkıe. Koshmar djýngleı)

Janry: ýjasy

Uzaqtyǵy: 90 mınýt

El: Kambodja, 2026

Rejısser: Djeremı Kıpp

YouTube vlogerleri elge tanymal bolýdy kózdep, Kambodjanyń ný ormanyna eles izdeýge attanady. Olar bul sapardy eles aýlaý týraly vırýstyq serıalǵa túsirmek bolady. Alaıda izdegen rýhtarynyń shynymen bar ekenin biledi. Olar osy jerdi jaılaǵan qorqynyshty qarǵystyń qurbanyna aınalady. Endi vlogerler máńgilik qaıtalanatyn tylsym tuzaqtan qutylýdyń amalyn izdeıdi.

Salmokdjı qarǵysy, (Proklıate Salmokdjı)

Janry: ýjasy

Uzaqtyǵy: 95 mınýt

El: Ońtústik Koreıa, 2026

Rejısser: Lı San-mın

Túsirilim toby onlaın kartaǵa joldyń jańa sýretterin túsirý úshin Salmokchı sý qoımasyna barady. Alaıda sol jerde kútpegen qorqynyshty jaǵdaıǵa tap bolady.

Pıngvınniń qyzyqty sapary, (Prıklıýchenııa pıngvınenka)

Janry: shytyrman oqıǵaly komedııa, otbasylyq fılm

Uzaqtyǵy: 72 mınýt

El: Reseı, 2026

Rejısser: Olga Amol

Máskeý haıýanattar baǵyndaǵy Kvı esimdi kishkentaı pıngvındi basqa qalaǵa aýystyrmaq bolady. Alaıda jolda kólik apaty bolyp, ol úlken qalada jalǵyz qalady. Osylaısha, kishkentaı pıngvınniń úıine oralý jolyndaǵy qyzyqty oqıǵalary bastalady.

Skrýdj

Janry: drama, komedııa, fentezı

Uzaqtyǵy: 111 mınýt

El: Ulybrıtanııa, AQSh, 2026

Rejısser: Taı Ýest

Oqıǵa Dıkkens dáýirindegi Londonda órbıdi. Bul – elester men tylsym oqıǵalarǵa toly hıkaıa. Basty keıipker ótkenin, búginin jáne bolashaǵyn tanytatyn erekshe saparǵa attanady. Osy jolda ol óz qatelikterin túsinip, ómirin ózgertýge taǵy bir múmkindik alady.

Inflıýenser

Janry: horror

Uzaqtyǵy: 95 mınýt

El: Ulybrıtanııa, AQSh, Danııa, 2026

Rejısser: Maık Nıbro

Tanymal amerıkalyq blogerdi derekti fılm túsirý úshin Eýropaǵa shaqyrady. Alǵashynda ony sándi qonaqúıler, tanymal brendtermen jumys jáne úzdik meıramhanalarǵa sapar kútip turady. Biraq belgisiz bireý oǵan áleýmettik jelidegi efırlerin toqtatýdy talap etip, qoqan-loqy jasaı bastaıdy. Bireýdiń ár qadamyn baqylap júrgenin túsingen bloger ózi tergeý júrgizýge kirisedi. Alaıda bul sheshimi ony odan ári qaýipti jaǵdaıǵa dýshar etýi múmkin.

Ótken aptadaǵy kınopremeralar tizimin osy jerden kóre alasyzdar.