Kınematografııa týraly zań shıki – Esetjan Qosybaev

NUR-SULTAN. QazAqparat – «Kınematografııa týraly» zańǵa túzetýler men ózgertýler engizý qajet. Bul týraly «Ulttyq kınony qoldaý memlekettik ortalyǵy» KeAQ basqarma tóraǵasy Esetjan Qosybaev aıtty, dep habarlaıdy QazAqparat tilshisi.

«Májilismendermen jáne senatorlarmen kezdesýge daıyndalyp jatyrmyz. Onda osy zańǵa («Kınematografııa týraly» zań) qatysty eń ózekti ári mańyzdy suraqtardy talqylaıtyn bolamyz. Qazirgi ýaqytta qyzý talqyǵa túsken zańdy dál osy kúıinde keri qaıtaryp alý kerek dep sanaımyz. Ony qyrkúıekte Májilistiń jańa sessııasyna engizý úshin pysyqtap, ózgertý qajet. Zańda talqylaýdy ári retteýdi qajet etetin kóptegen másele basy ashyq kúıinde qalyp otyr», - dedi ortalyq basshysy.

Onyń atap ótýinshe, memlekettik organdar men kınematografıster qoǵamdastyǵyn jalpy úılestirýge qatysty másele de ótkir tur.

«Qoǵamdyq uıymdarymyz, Kınematografıster odaǵy men Kınematografııa akademııasy búginde bárin tolǵandyryp júrgen máselelerdi aıtyp júr. Men olardy tolyqtaı qoldaımyn. Óıtkeni, olar kınematografııa qaýymdastyǵynyń basym bóliginiń pikirin bildiredi. Árıne, zańgerlerge de jumys kóp. Biraq, tyń kózqarasty sarapshylardy da shaqyrýǵa bolady. Zańshyǵarmashylyqta tıimdi nátıjege qol jetkizý úshin kınematografısterdiń búkil talabyna múmkindiginshe jaýap beretin, barlyq ózekti syn-tegeýrindi kórsetetin jańa zań jasaýǵa bar kúsh-jigerdi shoǵyrlandyrý kerek», - dedi ol.