Kınematografııa salasynyń úzdikteri «Qulager-2009» ulttyq júldesimen marapattaldy
ALMATY. Jeltoqsannyń 22-si. QazAqparat /Ádilet Musahaev/ - Keshe Almatyda QR Kınematografııa odaǵynyń uıymdastyrýymen jyl saıyn ótetin «Qulager-2009» ulttyq kınematografııa júldesimen laýreattardy marapattaý saltanaty ótti,
dep habarlaıdy QazAqparat.
Marapattaýdyń negizgi maqsaty - ulttyq kınematograftyń ótken jyldaǵy sapalyq deńgeıiniń damýyn baǵalaý. «Qulager-2009» júldesiniń «ulttyq kınoóneriniń tarıhnamalyq eńbegi» atalymy boıynsha Meńtaı Ótepbergenov jáne Tamara Ysmaıylova marapattaldy.
Derekti kıno túsirilimi boıynsha «Eshteńege bergisiz Nurmuhan» eńbegimen Bolat Sháripov jáne «Bekzat» týyndysy úshin Satybaldy Tekeev marapattaldy.
Kórkem kınolar arasynda «Qazaqfılm» AQ shyǵarylymyndaǵy «Kelin» fılmi eń úzdik dep tanyldy. «Úzdik rejısserlik eńbek» atalymy osy fılmniń rejısseri Ermek Tursynovqa buıyrdy. Sonymen qatar rejısser Aqan Sataevtyń «Adasqandar» fılmi de jyldyń úzdik fılmi dep tanyldy.
Júlde sheńberinde kınematografııa qaıratkerlerine qurmetti «Ekran sheberi» ataǵy tabys etildi. Qazaq ulttyq kınematografııasynyń damýyna úles qosqany úshin - Darıǵa Tynalına, Kúlpán Ahmetova, Turar Dúısebaev, Bolat Omarov jáne Serik Apyrymov sııaqty kınorejısserler atalmysh ataqqa ıe boldy.
