Kınematografııa salasyndaǵy «Qulager» ulttyq júldesiniń ıegerleri anyqtaldy
ASTANA. QazAqparat - Almatyda 14-shi Halyqaralyq Sháken Aımanov kınofestıvali sheńberinde Qazaqstan kınematografıster odaǵynyń ulttyq «Qulager» júldesin tabystaý rásimi ótti. Júldeniń basym bóligine Sh.Aımanov atyndaǵy «Qazaqfılm» kınostýdııasy jaryqqa shyǵarǵan fılmder ıe boldy, dep habarlaıdy QazAqparat tilshisi kınostýdııanyń baspasóz qyzmetin silteme jasap.
Belgili bolǵandaı, «Eń úzdik fılm» júldesi Sábıt Qurmanbekovtyń «Oralman» fılmine, al «Úzdik akter» júldesi osy fılmde basty róldi somdaǵan Dýlyǵa Aqmoldaǵa buıyrdy.
Qazaqstan kınematografıster odaǵynyń sheshimimen Ardaq Ámirqulov úzdik rejısser atandy («Únsizdikte» fılmi úshin). «Úzdik aktrısa» júldesin «Aıka» fılminde basty rólde oınaǵan Samal Eslıamovaǵa enshiledi. «Úzdik stsenarıı» nomınatsııasynda «Ákege qońyraý shalý» fılminiń stsenarıı avtory Serik Aprymov jeńiske jetse, úzdik prodıýser retinde «Almas qylysh» fılminiń prodıýseri Arman Asenovtyń esimi ataldy.
«Qulager» júldesin derekti kıno ókilderi de aldy. Máselen, «Altyn Emel» fılminiń rejısseri Oleg Belıalov «úzdik rejısser-dokýmentalıst» júldesine ıe boldy. Al Anvara Sadyqova men Ǵazız Nasyrov túsirgen «Qazaq bıi» derekti fılmi «Úzdik derekti fılm» júldesine qol jetkizdi.
Ulttyq kınojúldeni tabystaý rásiminde qazaq anımatsııasy da erekshe ataldy. Sh.Aımanov atyndaǵy «Qazaqfılm» kınostýdııasy jaryqqa shyǵarǵan tolyqmetrajdy «Muzbalaq» fılmi «Úzdik anımatsııalyq fılm» júldesin ıelendi. Odan bólek, «Qulager» júldesi Ramıl Ýsmanovqa (úzdik rejısser-anımator) jáne qazaq anımatsııasynyń damýyna úles qosqany úshin Jáken Dánenovqa tabystaldy.
Otandyq jas kınogerler de qur qol qaıtpady. «Úzdik qysqametrajdy fılm» júldesi «Asan» fılmi úshin Berik Jahanovqa, al «Úzdik debıýt» júldesi «Na granı» fılminiń rejısseri Aldııar Baırakımovqa tabystaldy.
Sarapshy komıssııa qazaq kınosynyń basqa da ókilderin júldemen marapattady. «Almas qylysh» kartınasy úshin Ajar Áýbákirova úzdik kostıým jónindegi sýretshi dep tanyldy. Odan bólek, «Qulager» músinshesin: operator Azamat Dýlatov («Lıft»), dybys rejısseri Sergeı Lobanov («Únsizdikte»), kompozıtor Qýat Shildebaev («Túrksib»), qoıýshy-sýretshi Ómirzaq Shmanov («Únsizdikte»), sýretshi-grımer Lıdııa Ordynskaıa («Anaǵa aparar jol»), sondaı-aq, kaskader Qasym Jumaǵojınder ıe boldy. Kınodaǵy úzdik effekti - «Cubic» stýdııasynda.
Qazaq kınosyna qosqan úlesi úshin Qadyr Qosaı men Igor Vovnıankoǵa Qulager syılyǵy tabystalyp, kınotanýshy Názıra Muqyshevaǵa da músinshe berildi.
