Kınematografııa, kitaphana, mýzeı: Aıda Balaeva men Reseı Mádenıet mınıstri birqatar máseleni talqylady
ASTANA. KAZINFORM — Máskeýde Qazaqstan men Reseı Federatsııasy arasyndaǵy mádenı-gýmanıtarlyq yntymaqtastyq jónindegi Kishi komıssııanyń tórtinshi otyrysy ótti.
Іs-sharaǵa eki eldiń Mádenıet mınıstrleri – QR Mádenıet jáne aqparat mınıstri Aıda Balaeva men RF Mádenıet mınıstri Olga Lıýbımova tóraǵalyq etti. Sondaı-aq jıynǵa eki el delegatsııalary qatysty. Mádenıet jáne aqparat mınıstrliginiń baspasóz qyzmeti málimetinshe, kezdesý barysynda Aıda Balaeva elder arasyndaǵy mádenı-gýmanıtarlyq yntymaqtastyqtyń jańa deńgeıge kóterilgenin atap ótti.
– Jalpy, áriptesterimizben birlese ázirlep, júzege asyryp jatqan jobalarymyz bizdiń vedomstvolar arasyndaǵy yntymaqtastyqty nyǵaıtyp, Qazaqstan men Reseıdiń mádenı-gýmanıtarlyq baılanystarynyń damýyna tikeleı yqpal etip jatyr, – dedi Aıda Balaeva.
Mınıstrler ózara yntymaqtastyqty odan ári damytýǵa baǵyttalǵan keń aýqymdy máselelerdi talqylady.
– Alda kóp jospar bar. Bul jobalardyń júzege asýy eki eldi burynǵydan da jaqyndastyryp, mádenıet salasyndaǵy yntymaqtastyqty nyǵaıta túsetinine senimdimin. Kishi komıssııa otyrysyna yntymaqtastyqtyń negizgi baǵyttaryna jaýapty áriptesterimiz jáne Reseıdiń jetekshi mádenıet mekemeleriniń ókilderi qatysyp otyr. Búgingi jıynda seriktestigimizdiń basty máselelerin, kıno salasy, kitaphana isi jáne mádenıet salasyndaǵy bilim berý baǵyttaryndaǵy birlesken sharalardy keńinen talqylaýdy usynamyz, – dedi Olga Lıýbımova.
Taraptar ózara yntymaqtastyqty odan ári damytýǵa baǵyttalǵan keń aýqymdy máselelerdi talqylady. Eki eldiń mádenıet uıymdarynyń basshylary birlesken jumystyń nátıjelerin usynyp, aldaǵy baǵyttardy aıqyndady.
Jıynda kınematografııa, kitaphana, mýzeı isi jáne mádenıet salasy qyzmetkerlerin daıarlaý máseleleri kóterildi.
Kishi komıssııa otyrysy aıasynda Temirbek Júrgenov atyndaǵy Qazaq ulttyq óner akademııasy men GITIS Reseıdiń teatr óneri ınstıtýty arasyndaǵy yntymaqtastyqtyń tıimdiligin arttyrý jónindegi Jol kartasyna qol qoıyldy. Qujatta akterlik sheberlik, sahna tili, horeografııa, teatr menedjmenti jáne prodıýserlik baǵyttardaǵy birlesken bastamalar qamtylǵan.
Sonymen qatar búgin Máskeýde Reseıdegi Qazaqstannyń mádenı kúnderi bastaldy.
Ekijaqty kezdesý barysynda Aıda Balaeva Reseı Federatsııasynyń Mádenıet mınıstri Olga Lıýbımovaǵa is-sharalar uıymdastyrýǵa jáne ótkizýge qoldaý kórsetkeni úshin alǵys bildirdi.