Kináni óz moınymyzdan alyp tastaı almaımyz - ákim orynbasary Petropavldaǵy jaǵdaı týraly
«Oqýshynyń mektepke qalaı qabyldanǵany týraly suraqtar qoıyldy. Biz QR «Densaýlyq týraly» Kodeksine sáıkes medıtsına qyzmetkeriniń qupııasyn quraıtyn málimetterdi adamnyń kelisiminsiz tek anyqtaý organdarynyń, prokýrordyń, sottyń suraýy boıynsha ǵana berýge jol beriletinin jaqsy bilemiz. Osylaısha, mektep uıymy balanyń dıagnozyn bile almaǵan. Eshqandaı normatıvtik aktide psıhıkalyq aýrýy bar balalarǵa jalpy bilim beretin mektepte oqýǵa tyıym salynatyny kórsetilmegen. Sondyqtan, barlyq suraqtarǵa tolyq jaýap berýge tyrystyq», - dep túsindirdi Marat Tasmaǵanbetov Oqý-aǵartý mınıstrliginiń shuǵyl keńesinde.
Onyń aıtýynsha, mamandandyrylǵan kúzet pen densaýlyq saqtaý mamandary tarapynan psıhıkalyq aýrýlar týraly aqparat berý máselesin quqyqtyq retteý boıynsha usynystar kelip túsken.
«Biz kináni óz moınymyzdan alyp tastamaımyz. Osy jaǵdaıǵa baılanysty týyndaǵan barlyq máselelerdi moraldyq jáne materıaldyq turǵydan sheshý úshin jan-jaqty is-sharalar keshenin ótkizýge tyrysamyz», - dep ýáde berdi Marat Tasmaǵanbetov.
Ol sondaı-aq, qaýipsizdikti qamtamasyz etý úshin óńirdegi 465 mektepte 9 313 kamera ornatylǵanyn, jedel basqarý ortalyǵyna 320 mektep qosylǵanyn aıtty. Dabyl túımeleri 328 mektepte bar.
Eske salsaq, keshe Petropavlda 9 synyp oqýshysy mektepke balta men pyshaq ala kelip, 3 oqýshyny jaraqattady. Keıin zardap shekken eki balaǵa ota jasaldy.
Bul oqıǵaǵa qatysty túsinikteme bergen Premer-Mınıstrdiń orynbasary Altaı Kólginov atalǵan mektepte lıtsenzııasy bar kúzet qyzmeti bolmaǵanyn málim etti.
