Kináliler jylýy joq túrmede jazasyn óteıdi dep senemin – Dımash Ekibastuzdaǵy apat jaıly

ASTANA. QazAqparat – Tanymal qazaqstandyq ánshi Dımash Qudaıbergen Ekibastuzdaǵy apatqa qatysty pikir bildirdi, dep habarlaıdy QazAqparat tilshisi.

Ekibastuzdaǵy halyqtyń jaǵdaıy úshin alańdap otyrǵanymdy aıtpasam da túsinikti bolar. Meniń paraqshamdy kóptegen basqa memlekettiń adamdary oqıtyn bolǵasyn, ishki máselemizdi syrtqa shyǵarǵym kelmep edi. Biraq, myna dalada qalǵan analarymyzdyń kóz jasy zaıa ketpesin deseńizder, JEO basshysynan bastap, kinálilerdiń barlyǵy jaýapqa tartylyp, jylýy joq túrmede jazasyn óteıdi dep senemin, -

dep jazdy Dımash Qudaıbergen óziniń Іnstagram paraqshasynda.

Eske salaıyq, 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qaldy.

Keıin jylý qazandyǵynyń isten shyǵýyna baılanysty oblys ákimi bastaǵan jedel shtab quryldy.

Ekibastuz qalasynyń oqýshylary onlaın oqýǵa kóshirildi.

28 qarasha kúni tańerteń qalada jergilikti aýqymdaǵy tótenshe jaǵdaı jarııalandy.

30 qarashada Ekibastuzǵa Premer-Mınıstr Álıhan Smaıylov baryp, kináliler jaýapqa tartylatynyn aıtty.

Apat sebebi retinde jylý jelileriniń tozýy, jylý ortalyǵy basshylyǵynyń nemquraılylyǵy men ınvestıtsııalardyń jetkiliksizdigi ataldy.

Memleket basshysynyń tapsyrmasy boıynsha Premer-Mınıstrdiń birinshi orynbasary Roman Sklıar qalalyq jylý jelilerindegi apattyń saldaryn joıý jónindegi jumystar aıaqtalǵansha Ekibastuzda bolatyny habarlandy.

Búgin Roman Sklıar telefon arqyly Úkimet basshysy Álıhan Smaıylovqa qalalyq jylý jelilerindegi apattyń zardaptaryn joıý barysy týraly baıandady.