Kimniń jerin mekendeseń, sonyń jyryn jyrla - respýblıkalyq basylymdarǵa sholý

Keshe Astanadaǵy Táýelsizdik saraıynda QR Prezıdenti janyndaǵy Shet­el ınvestorlary keńesiniń 22-shi plenarlyq otyrysy bolyp ótti. Onyń kún tártibine «Qazaq­stan­da­ǵy ártaraptandyrý jáne tehnologııalyq saıasatyna shetel­dik ınvestorlardyń qatysýy tý­ra­ly» másele qoıyldy.  Keńes ju­­my­­syn Memleket basshysy Nur­­sul­tan Nazarbaev ashyp, kirispe sóz sóıledi.  Osy aıtýly is-sharaǵa oraı «Egemen Qazaqstan» gazetinde «Kimniń jerin mekendeseń, sonyń jyryn jyrla» degen taqyryppen kólemdi maqala jaryq kórdi.

Onda «Biz aldaǵy ýaqytta ekonomı­ka­ny ártaraptandyrý jáne ónimderdi tereńdetip óńdeý boıynsha bizge naqty bir joba usynǵan sheteldik ınvestorlarmen ǵana jumys isteıtin bolamyz. Eger mundaı sheshim oryndalmaıtyn bolsa, biz Qazaqstan ekonomıkasy úshin tıimdi jumys atqara alatyn basqa áriptesterdi izdestirýge múddeli­miz. Eger oǵan mindetteıtin zań qajet bolsa, ony qabyldaımyz», degen Elbasynyń sózi keltirilgen.

 Shet­el ınvestorlary keńesiniń 22-shi plenarlyq otyrysy jaıynda egjeı-tegjeıli jazylǵan kelesi maqala «Aıqyn» gazetiniń búgingi sanynda da jaryq kórgen. Ol «Bizde naqty baǵdarlama men strategııa bar» degen taqyryppen berilgen. Basylymnyń jazýynsha, otyrysta sóz sóılegen Memleket basshysy «biz ózimizdiń rzervterimizdi saqtap qana qoımaı, ulǵaıta aldyq. 2009 jylǵy 30 qarashadaǵy jaǵdaı boıynsha, Ulttyq qordyń aktıvteri jáne eldiń altyn-valıýta rezervteri 52 mıllıard dollardy qurady», degen.

 «Qazaqstan shıkizatty tereńdetip óńdeýmen jáne ekonomıkany dıversıfıkatsııalaýǵa baǵyttalǵan naqty jobalardy júzege asyrýdy usynǵan ınvestorlarmen ǵana jumys isteıtin bolady. Bul týraly Memleket basshysy Nursultan Nazarbaev QR Prezıdenti janyndaǵy Shet­el ınvestorlary keńesiniń 22-shi plenarlyq otyrysynda málimdedi», dep jazady «Ekspress K» basylymy.

Sonymen qatar aýqymdy is-sharaǵa oraı «Kazahstanskaıa pravda», «Lıter», «Komsomolskaıa pravda Kazahstan» basylymdarynda da maqalalar jarııalanǵan.

  Memleket basshysy - Qazaqstan Respýblıkasy Qarýly Kúshteriniń Joǵarǵy Bas qolbasshysy Nursultan Nazarbaevpen bolǵan tikeleı jeli kezinde Qorǵanys mınıstrliginiń jumysyna qatysty 600-ge jýyq suraq kelip túsken bolatyn. Saýaldar elimizdiń áskerı qaýipsizdigi, áskerı qyzmetshiler men olardyń otbasy músheleriniń áleýmettik qorǵalýy, turǵyn úımen qamtamasyz etý, ásker qataryna shaqyrylý jáne áskerı qyzmetti óteý, áskerı bilim berý sııaqty baǵyttardy qamtıdy. Osyǵan oraı «Egemen Qazaqstan» gazetiniń senbilik nómirinde osy saýaldar boıynsha QR Qorǵanys mınıstri Ádilbek Jaqsybekov jaýap bergen. Berilgen jaýaptarmen «Armııa halqymyz maqtanatyndaı bolsyn» degen taqyryptaǵy maqaladan egjeı-tegjeıli tanysa alasyzdar.

 «Reseı tarıhynda ózindik orny bar «Tavrııa» saraıynyń Dýma zalynda Táýelsiz memleketter dostastyǵy Parlamentaralyq Assambleıasynyń 33-shi plenarlyq otyrysy bolyp ótti. Oǵan Qazaqstan Parlamenti Májilisiniń Tóraǵasy Oral Muhamedjanov bastaǵan elimiz delegatsııasy da tolyq quramda qatysty», dep jazady «Egemen Qazaqstan» gazeti «Integratsııalyq úderisterde ekpin bar» atty  maqalasynda.

 Sondaı-aq osy basylymda Qazaqstannyń halyq jazýshysy, QR Parlamenti Senatynyń depýtaty Ábish Kekilbaevtyń 70 jyldyq mereıtoıyna oraı  birqatar elge tanymal azamattardyń maqalalary jaryq kórgen. 

***

«Aıqyn» gazetiniń dástúrli «Aq sóıle!» aıdarynyń búgingi qonaǵy - Qazaqstannyń halyq jazýshysy, QR Parlamenti Senatynyń depýtaty Ábish Kekilbaev. Basylymnyń saýaldaryna tushymdy jaýap bergen qalamgermen aradaǵy suhbat «Bılik dese ákesin, baılyq dese babasyn satatyndar buryn da bolǵan, qazir de bar» degen taqyryppen jarııalanǵan.

 «Basqalardy qaıdam, Almaty qalasy Medeý aýdany aýmaǵyndaǵy áıgili Kóktóbeniń túbine ornalasqan jeti úıdiń úlkendi-kishili 50 shaqty turǵyny tún balasy kóz ilmeı ár túndi úreımen ótkizýde. Sebebi - Almaty qalasyn aınalyp ótýi tıisti alyp avtoban dál osy tustan salyna bastaǵaly ózi «áýpirimmen» áreń turǵan úılerdiń qabyrǵalary  birtindep «sógile» bastapty», dep jazady «Aıqyn» gazeti. Jazylǵan jaıt tóńiregindegi tolyq maǵlumatty osy basylymnyń senbilik sanynda jaryq kórgen «Jar qabaǵyndaǵy jeti úı» degen maqaladan oqı alasyzdar.

 «Jeti trıllıon teńgeni qaıdan jáne qalaı alamyz?». Osy taqyryppen «Aıqyn» basylymynda jarııalanǵan kelesi maqalada aıtylǵan jaıtqa oraı elimizge tanymal ǵalymdardyń pikirleri toptastyrylǵan.

***

«Astana aqshamy» gazetiniń senbilik sanynda elorda ákimi Imanǵalı Tasmaǵambetovtyń «Nur Otan» HDP qalalyq fılıalynda bergen esebi jaıynda jazylǵan.

 Osy basylymda «Astana - táýelsizdigimizdiń aıbary» degen taqyryppen jarııalanǵan kelesi maqala Aqmola qalasynyń elimizdiń astanasy bolyp jarııalanǵanyna 12 jyl tolýyna arnalǵan.

***

«Ókpege kútim kerek, kútim úshin tútin kerek» dep qoıady shylymqorlardyń biri. Taǵy biri «as - adamnyń arqaýy, temeki - onyń tarqaýy» dep sheshensıdi. Shyntýaıtynda, kók tútindi kórpedeı jamylǵan qalada ókpege onsyz da az salmaq túsip jatqan joq. Temeki shekpeıtin adamnyń ózi ókpem «áınekteı» taza deı almas. Al onyń qasynda shylymqor tursa, ne joryq? «Ár adamnyń densaýlyǵy - ult saýlyǵy» dep qarasaq, bıylǵy qazannan bastap júzege asa bastaǵan shylym shegýdi shekteýge baǵyttalǵan qadamǵa sáttilik tileý kerek» dep jazady «Jas qazaq» gazeti. Jazylǵan jaıtqa qatysty egjeı-tegjeıli maǵlumattarmen basylymda jarııalanǵan «Shylymdy shekteımiz dep, kásipkerdi qylqyndyrmaıyq» atty maqaladan tanysa alasyzdar.

 Osy basylymda jazýshy Dýlat Isabekovpen aradaǵy suhbat «Abaı joly» qazir jazylmaǵany durys boldy» degen taqyryppen berilgen. «Keıde men Muhtar Áýezovtiń «Abaı joly» romany qazirgi kezde jazylmaǵany durys boldy dep oılaımyn. Qazir jazsa, ne ister edi ol? Ana tórt kitapty qalaı aqsha taýyp shyǵarar edi? Ony basqa tilderge aýdarý kerek. Búgingi kez bolsa, ony aýdarmaq túgil, baspa qazaqshasynyń ózin áreń basyp shyǵarar edi. Bul romannyń sol Keńes Odaǵy kezinde jazylyp qalǵany durys boldy», depti qalamger suhbat barysynda. Ekeýara áńgimeniń tolyq nusqasyn «Jas qazaq» basylymynan oqı alasyzdar.

***

Memleket basshysy Nursultan Nazarbaev jýyrda ótkizgen tikeleı jelide qazaqstandyqtardyń koıǵan saýaldaryna barlyq memlekettik organdardyń jetekshileri jaýap berýi kerek dep tapsyrǵan bolatyn. Osyǵan oraı búgin  «Kazahstanskaıa pravda» gazeti arqyly QR Qurylys jáne turǵyn úı-kommýnaldyq sharýashylyq isteri agenttiginiń tóraǵasy Serik Nokın qazaqstandyqtardyń saýaldaryna jaýap bergen.

 «Sońǵy 9 jylda Qazaqstanda túsirilgen jalǵyz qazirgi zamanǵy «Arman qala» serıaly óziniń alǵashqy syılyǵyn ıelendi», dep jazady «Lıter» gazeti. Qazaqstandyq serıal «Strana» ulttyq syılyǵyn 25 eldiń 200 teleradıokompanııasy qatysqan HІІ Eýrazııalyq teleforýmda ıelengen.