Kıimimniń túsine qaraı boıanyp, rýlge otyramyn - avtobýs júrgizýshisi
AQTÓBE. KAZINFORM – Muńsyz Tilegenova 40 jyldan astam ýaqyttan beri qoǵamdyq kólik júrgizedi. Alǵashynda trolleıbýsty tizgindedi, qazir avtobýs aıdaıdy. Ol birde-bir ret jol erejesin buzbaǵan, jaýapqa tartylmaǵan. Kazinform tilshisi 15-16 saǵat jumys istep, eki kún demalatyn qoǵamdyq kólik júrgizýshisimen kezdesip keldi.
Aqtóbe qalasynda qoǵamdyq kólik júrgizetin jaǵyz áıel júrgizýshi bar. Halyqaralyq áıelder kúni qarsańynda Muńsyz Tilegenovamen kezdesýdiń sáti tústi. Kezdesý týra jumys ýaqytynda boldy.
19 jasynda júrgizýshi bolýdyń qyr-syryn úırenip, oqyǵan qyz búginge tájirıbeli eńbek adamy. Eki jyl buryn zeınetke shyqsa da jumysyn tastamady, tipti avtobýs júrgizbese kóńili qulazyp, aýrý-syrqaýy kóbeıdi. Sodan soń úıde otyryp emes, jumysta júrip sharshaǵandy jón kóredi.
— Bir avtobýsty úsh adam júrgizemiz. Bir kún jumys, eki kún demalys. Bul óte jaqsy jumys rejımi. Ózim aýysymǵa shyǵatyn kúni tańǵy saǵat 04:00–de turamyn. Shaı qoıyp, jattyǵý jasaımyn. Túski asty, shaıdy quıyp alyp, saǵat 04:45–te úıden shyǵamyn. Ózimniń kóligim bolmaǵan soń áriptesterimniń qaısysy erte keledi, solarǵa ilesip avtoparkke jetip alamyn. Sodan kezegim kelgenshe birer saǵat kútip, marshrýtqa shyǵamyn. Jumys túngi saǵat 22:00–23:00-ge deıin jalǵasady. Bir jaqsysy bir kún 15-16 saǵat jumys istegen soń eki kún demalysymyz bar. Avtobýstyń «ushqyshy» sııaqtymyz. Jumys aıaqtalǵan soń avtobýsty turaqqa qoıyp, úıge kete beremiz. Onyń janarmaıyn toltyrý, jýý ózge adamdardyń jumysy, — dedi Muńsyz Tilegenova.
Muńsyz Tilegenova — egizdiń syńary. Kópbalaly otbasynda ómirge kelgen. Mektep bitirgen soń arman qýyp, oqýǵa túsýdi emes, otbasyna qolqabys bolýdy oılady, baýyrlaryna qamqorlyq tanytty.
Aǵasynyń aıtýymen 19 jasynda oqý kombınatyna baryp, trolleıbýs júrgizýdi meńgeredi. Úsh aı Aqtóbede oqyp, keıin Almatyda biliktiligin jetildirdi.
— Men 19 jyl boıy trolleıbýs júrgizdim. Onyń da ýaqyty ótip, trolleıbýs qoǵamdyq kólik sanatynan alyndy. Al men Qaraǵandyǵa kettim. Ol jerde birneshe aı kondýktor bolyp jumys istep, avtobýs júrgizýdi úırengim keldi. Jumys istep júrip, C jáne D sanattaryna tapsyrdym, tórt aıda júrgizýshi kýáligin aldym. Qaraǵandydaǵy avtopark brıgadırine baryp, bes kún taǵylymdamadan óttim. Meniń enshime tıgen avtobýstyń jaǵdaıy ortasha boldy. Jóndeıtin jeri kóp, qosalqy bólshekterin aýystyrý kerek. Jóndeý tsehyna barǵanda maǵan kóbi tańyrqaı qaraǵan. Solardyń ishinde biri bar kómegin berip, avtobýsty qarap, retke keltirip berdi. Birer jyl sonda eńbek etip, Aqtóbege keldim, zeınetke de shyqtym. Aqtóbege kelgende úıge syımaı, jumys istegim keldi. Qazir № 51A baǵytynda avtobýs júrgizemin. Esh qıyndyǵy joq, — dedi ol.
Avtobýs júrgizýshisi kıimdi bir tústen tańdaǵandy jón kóredi. Soǵan saı kózin boıap, jas kezinde tyrnaǵyn da sándegen. Qazir aq qolǵap kıip, saqınalaryn tizbektep alady.
Bul jolda ótkizip jiberýge ruqsat suraǵanda jıi kómektesedi.
— Rýlde áıel otyrǵanyn qalaı biledi? Men qolǵap kıip, saqınalarymdy taǵyp alamyn. Qolymdy terezeden shyǵaryp, ruqsat suraımyn. Kóbi iltıpat kórsetip, jol beredi. Ári terimniń kúnge allergııalyq áserim bar. Jazda qolǵapty tastamaımyn. Shynynda men kıimdi bir tústen tańdaǵandy unatamyn. Kezekti aýysymǵa kók tústi tańdadym. Sol sekildi qyzyl, qyzǵylt, saryny da kıe beremin. Qaraǵandyda júrgen kezde maǵan jolaýshylar qatty qyzyǵatyn, — dedi júrgizýshi.
Muńsyz Tilegenova — ul tárbıelep otyrǵan ana. Ázirge jumysyn jalǵastyra bermek. Oǵan densaýlyǵy jarap-aq tur. Aýysymǵa shyqqanda medıtsınalyq tekserýden ótip, ruqsatyn da alady.
Ózi bolsa jolaýshylarǵa kóńil-kúı syılap, ázildep te otyrady. Jolaqysyn tóleı almaǵandary mán-jaıdy jasyrmaı aıtyp, keshirim surasa, ózi de keshirimmen qaraıdy.
Buǵan deıin elimizde tósek tartyp jatqan qarııalardyń kútimin jasaıtyn áıelder týraly jazǵan edik.