«Qymyz ishtim»: Aqtóbede mas kúıinde kólik aıdaǵan sheneýnik 15 táýlikke qamaldy

AQTÓBE. KAZINFORM - Áıteke bı aýdandyq aýyl sharýashylyǵy jer qatynastary bóliminiń basshysy Aqylbek Isataev mas kúıinde kólik júrgizip, 15 táýlikke qamaldy.

Áıteke bı aýdandyq sotynda aýyl sharýashylyǵy jer qatynastary bóliminiń basshysy Aqylbek Isataevqa qatysty is qaraldy. Oǵan Ákimshilik quqyq buzýshylyq týraly kodeksi 608-baby 1-bóligi boıynsha aıyp taǵyldy.

Іs materıalyna súıensek, A.Isataev 14 aqpan kúni saǵat 01:22-de Áıteke bı aýdany T. Júrgenov aýylynda kólikti mas kúıinde aıdaǵan. Bólim basshysy sot otyrysy kezinde kólik aıdaǵanyn, alaıda mas bolmaǵanyn, tek 1-1,5 lıtr qymyz ishkenin aıtty. Alaıda jeńil dárejede mas bolǵany medıtsınalyq saraptama kezinde anyqtaldy.

Sot kabınetindegi aqparatqa súınsek, prokýror A. Isataevty kináli dep tanyp, 15 táýlikke ákimshilik qamaqqa alý jáne 7 jyl merzimge kólik quralyn basqarý quqyǵynan aıyrýdy surady. Sot qaýlysymen Aqylbek Isataev Ákimshilik quqyq buzýshylyq týraly kodeksi 608-baby 1-bóligimen kináli dep tanylyp, 15 táýlikke ákimshilik qamaqqa alyndy. Sonymen birge 7 jyl merzimge kólik quralyn basqarý quqyǵynan aıyryldy.

Aıta keteıik, buǵan deıin Aqtóbe qalalyq bilim bóliminiń basshysy aýdıtke jalǵan aqparat bergeni úshin jazalandy.