Qymyz Germanııada emdik turǵydan suranysqa ıe — nemis kásipkeri
ASTANA. KAZINFORM — Hans Tsolman — nemis kásipkeri, fermer, bıe sútinen jasalǵan qurǵaq (sýblımatsııalanǵan) ónimder, qymyz jáne bıe súti negizindegi kosmetıka óndirýshi.
Sheteldik meıman Astanada ótip jatqan «BaiQymyz» ulttyq taǵamdar gastrofestıvaline arnaıy kelgen. Osy oraıda Kazinform tilshisi qymyzdy kásip etken sharýa ıesimen tildesken edi.
— Qymyzdy Germanııaǵa alǵash ákelgen meniń qaıyn atam, naqty aıtqanda 1959 jyly Qazaqstannan qymyz alyp barǵan. Qazir bizdiń qymyz óndiretin kásiporyn 66 jyl jumys istep tur, kásiporyn jumysyn odan ári ilgerilete beremiz. Germanııada qymyzǵa suranys bar, ásirese emdik turǵydan. Nemister qymyzdy tabıǵı ónim retinde, densaýlyǵyn qalpyna keltirýge tutynady, — dedi Hans Tsolman.
Kásipkerdiń aıtýynsha, nemis halqy qymyzdyń maıly bolǵanyn qalamaıdy, sondyqtan qymyz birneshe ret óńdeýden ótedi.
— Biz qymyzdy saýa salyp, sol kúıinde usynbaımyz, ol óńdeledi. Sondaı-aq nemister úshin qymyz kúndiz tutynatyn taǵam qataryna jatpaıdy, ony keshke qaraı ishedi. Baǵaǵa kelsek, bir lıtr qymyz 15 eýro turady. Biz aıyna 2-3 myń lıtr qymyz óndiremiz. Taǵy bir aıta ketetin jaıt, bizde qymyz untaq túrinde de satylady. Bizdiń klıentter qatarynda, nemis halqynan bólek, Germanııadaǵy qazaqstandyqtar bizdiń fermaǵa kelip qymyz ishedi, odan bólek Germanııadaǵy qazaqstandyq elshiler bizdiń turaqty qonaǵymyz, — deıdi nemis kásipkeri.
Hans Tsolman basqaratyn Mıýlben qalasyndaǵy ferma — Germanııadaǵy qymyz óndirýge mamandanǵan eń iri ári kóne kásiporyn. Osy oraıda kásipker ózin qymyz óndirýmen aınalysatyn ekinshi býyn ókili dep sanaıdy.
Aıta keteıik, Hans Tsolman elordada ótip jatqan qymyz festıvali aıasynda uıymdastyrylǵan ǵylymı konferentsııada baıandama jasady. Ol jerde qymyzdyń emdik qasıetteri, jylqy sharýashylyǵy men dástúrli mal sharýashylyǵynyń damý bolashaǵy talqylandy. Ǵylymı konferentsııaǵa Germanııa, Reseı, Qyrǵyzstannan kelgen ǵalymdar, dárigerler, veterınarlar men kásipkerler qatysty.
Eske salsaq, kesheden beri elordada «BaiQymyz» ulttyq taǵamdar gastrofestıvali ótip jatyr.
Qazir qymyz óndirýshiler «Eń úzdik qymyz» ataǵy úshin talasyp jatyr. Júlde qory — 45 mıllıon teńge (I oryn — 20 mln teńge, II oryn — 15 mln teńge, III oryn — 10 mln teńge). Jeńimpazdar búgin belgili bolady.
Baıqaýdyń maqsaty — elimizdegi eń sapaly ári shıpaly qymyzdy anyqtaý. Negizgi maqsat — qymyzdy densaýlyq pen qonaqjaılyqtyń sımvoly retinde tanytý, sonymen qatar agrotýrızm men jylqy sharýashylyǵyn damytýǵa serpin berý.
Sondaı-aq elordada ótip jatqan festıvalge el óńirlerinen 30 tonnaǵa jýyq qymyz ákelindi, osy oraıda uıymdastyrýshylar rekord ornaǵanyn aıtyp otyr.