Qymbattaǵan jobalar aýyrtpalyǵyn jergilikti bıýdjetke júkteı salý durys pa
Úkimet kóleńkeli ekonomıkanyń úlesin azaıtýǵa erekshe mán berýi kerek. Bul týraly Májilis depýtaty Edil Jańbyrshın aıtty, dep habarlaıdy Kazinform tilshisi.
«Bizde bıýdjet qarjysynyń jetispegeninen biraz másele bar. Meniń oıymsha, Úkimet kóleńkeli ekonomıkanyń úlesin azaıtýǵa erekshe mán berýi kerek. Mamandardyń aıtýynsha, bizde áli de 30 paıyzǵa deıin kóleńkeli ekonomıka bar. Ekinshiden, ımport tym joǵary, ıaǵnı jylyna 52 mlrd AQSh dollaryna jetip jatyr. Bul baǵyttaǵy jumystar tıisti deńgeıde atqarylmaı otyr», – dedi E. Jańbyrshın Májiliste jańa Bıýdjet kodeksiniń jobasyn tanystyrýǵa arnalǵan otyrys kezinde.
Sonymen qatar depýtat Kazinform agenttigi tilshisine jobalardyń qymbattaýy máselesine qatysty atalǵan kodeks aıasynda tıisti sheshim jasaý kerek ekenin aıtty.
«Túzetýge qatysty bárin jergilikti bıýdjetke berip tastaý kerek degenmen kelispeımin. 15 mlrd teńgege baǵalanǵan keıbir jobalar 40 mlrd teńgege deıin jetken. Muny jergilikti bıýdjet ózi jalǵyz kótere almaıdy. Osynyń saldarynan tıisti tapsyrmalar oryndalmaı qalady», – dedi ol.
E. Jańbyrshın jobalar qymbattaǵan kezde qarjylandyrýdy 50/50 qaǵıdaty arqyly iske asyrý kerektigin málim etti. Jartysyn respýblıkalyq bıýdjetten jáne qalǵanyn jergilikti bıýdjetten qarjylandyrý qajet.
«Josparlaýǵa toqtalsaq, keıbir jobalar qymbattap ketedi. Bastapqydaǵy jobadan birneshe ese ósip ketken jobalar bar. Bizdiń oıymyzsha, jańa Bıýdjet kodeksinde osy júktemeni respýblıkalyq jáne jergildikti bıýdjet teń kóterýi kerek», – palata ókili.
Atap aıtqanda, Májiliste jańa Bıýdjet kodeksiniń jobasyn tanystyrý kezinde Ulttyq ekonomıka vıtse-mınıstri Azamat Ámrın respýblıkalyq bıýdjetten qarjylandyrýǵa tek eldegi aýqymdy ári asa mańyzdy ınfraqurylymy bar jobalar ǵana engiziletinin aıtty.
«Al qalǵan jobalar jergilikti bıýdjet esebinen qarjylandyrylady. Bul turǵyda jergilikti bıýdjetterdi nyǵaıtyp, salyqtardyń bir bóligin sol jaqqa aýdaramyz. Osy oraıda jobalar qymbattaǵan kezde, bul kirister qosymsha shyǵyndardy jabýǵa múmkindik beredi. Sonymen qatar, josparlaý protsesi ońtaılandyrylyp, maqsatty ındıkatorlarǵa baılanady», – dedi A. Ámrın.
