Kimasar shatqalynda adasyp ketken almatylyq tabyldy
ALMATY. QazAqparat – Almatynyń qutqarý qyzmeti «Kimasar» shatqalynda jalǵyz ózi adasyp qalǵan er adamdy taýyp, qalaǵa jetkizdi, dep habarlaıdy QazAqparat tilshisi.
«Qutqarýshylar geolokatsııa arqyly «Kimasar» shatqalynda tońyp otyrǵan 28 jastaǵy er adamdy tapty. Ol medıtsınalyq kómekke muqtaj bolǵan joq. Qutqarýshylardyń kómegimen qalaǵa evakýatsııalandy», - dep habarlady Almaty qalasynyń qutqarý qyzmetinen.
Qutqarý qyzmetine qalalyq tótenshe jaǵdaılar departamentinen «Fýrmanov» shyńynyń aýmaǵynda jas jigittiń joǵalýyna baılanysty shaqyrtý túsken.
Belgili bolǵanyndaı, ol daýyl týraly eskertý habarlamalarǵa mán bermeı, kúndiz jalǵyz ózi taýǵa shyǵyp ketken. Qarańǵy túskende kelgen jolyn taba almaı, adasyp qalǵan.
Buǵan deıin «Kishi Almaty» shatqalynda jaraqattanǵan balanyń qutqarylǵanyn habarlaǵanbyz.
