Əkim Semeı qalasynyń jasyna qatysty pikir bildirdi
ÓSKEMEN. QazAqparat - Bir top belsendiniń Semeı qalasynyń 300 jyldyǵyn toılaý týraly usynysyna qala ákimi Ermak Sálimov pikir bildirdi, dep habarlaıdy QazAqparat tilshisi.
Belsendi Nıkolaı Isaev shahar basshysymen kezdesýinde Semeıdiń 300 jyldyǵyn atap ótý qajettigin alǵa tartty.
«Qalamyzǵa ınvestıtsııa qajet. Ony tartýdyń bir joly - qalanyń mereıtoıyn toılaý. 300 jyldyq data talaıdyń nazaryn aýdaratyny sózsiz. Osylaısha biz qalaǵa jańa ınvestıtsııa kózderin tartar edik, - dedi Nıkolaı Isaev.
Qala ákimi bul usynysqa qatysty óz ustanymyn bildirdi.
«Men bul týraly oıymdy buryn da aıtqanmyn. Áýeli qalanyń jasyna qatysty derekti turaqtandyrý qajet. Semeıdiń tarıhy 1000 jylǵa jete me, joq álde 300 jylǵa jete me, belgisiz. Naqty dáleli tabylǵansha, qala kúnin ǵana toılaıtyn bolamyz. Semeıdiń áleýmettik-ekonomıkalyq jetistikterin pash etetin sharalardyń barlyǵy qyrkúıektiń sońǵy jeksenbisinde ótkizilýi kerek» - dedi Ermak Sálimov.
Qala tarıhyn zertteýshiler Semeıdiń jasyna baılanysty bir toqtamǵa kele almaı júrgenine talaı boldy. Amantaı Isın sııaqty tarıhshylar qalanyń tarıhy 1000 jylǵa jetetinin aıtyp, 1718 jyly qaladan qazaqtar syrtqa kóshirilgenin dáleldep baǵýda.
Al jergilikti muraǵat isiniń mamandary Semeıdiń irgesi 1718 jylǵy otarlaýmen birge qalanǵan degen pikirde. Endi bir top Semeıdiń tarıhy 800 jyldy qamtıdy degen nusqa aıtyp júr.
«Sáýir aıynda osy máselege baılanysty aýqymdy ǵylymı konferentsııa ótkizý josparlanǵan. Osy basqosýda ǵalymdar bir toqtamǵa keler degen úmitimiz bar» - deıdi qalalyq ishki saıasat bóliminiń basshysy Aıdar Sadyrbaev.
Foto: vk.com
