Kim «Qazaqstan daýysy» atanady?
ASTANA. 15 qańtar. QazAqparat - Elimizdiń eń myqty daýys ıesiniń kim ekenin bilgińiz kele me? Onda Ulttyq arnada «Qazaqstan daýysy» jobasynyń aqtyq synyn tamashalańyz. Birneshe aıǵa sozylǵan án báıgesine elimizdiń túkpir-túkpirinen nebir kúmis kómeı ánshiler qatysty. Jobanyń tórt tálimgeri osy talanttardyń arasynan daýysyn tyńdaý arqyly naǵyz daryndy degenderdi óz tobyna iriktep aldy. Qatań synnan ótken tórt talant endi aqtyq synda baq synaıdy. Bul tek úmitkerler emes, tálimgerler úshin de úlken syn bolmaq.
Ótken aptada, ıaǵnı 12 qańtardaǵy tikeleı efır kezinde ár toptan 8 úmitker óner kórsetti. Jobanyń sharttary kúnnen-kúnge qıyndap, ánshilerdiń namysyn qaıraı tústi. Bul kezeńniń erejesi sál ózgesheleý boldy. Eki ónerpazǵa da kórermen daýys berdi. Sonymen qosa tálimger ánshini 100 paıyzdyq kórsetkish boıynsha baǵalap, daýysynyń 60 paıyzyn bir úmitkerge, al ekinshisine 40 paıyzyn usyndy. Sonan soń kórermen men tálimger bergen daýystyń ortaq qorytyndysy boıynsha aqtyq synǵa joldama alatyn ónerpaz anyqtaldy.
Mine, osylaısha ár toptan eki-ekiden qalǵan 8 úmitker tikeleı efırde jandy daýysta án saldy. Nurlan Albannyń tobynan Shaharızat Seıdahmet tálimgerinen 60 paıyz daýys alyp, kórermen kóp daýys bergen Tańatty basyp ozdy. Al Almas Kishkenbaevtyń tobynan tálimgerdiń 60 paıyz daýysyn alǵan Tımýr Omarov ortaq qorytyndy boıynsha 104,5 paıyz jınap, 95,5 paıyz alǵan Berdibek Qulǵaraevtan ozyq shyqty. Alaıda keıbir úmitkerler tálimgerinen tómen paıyz alsa da, kórermenniń qoldaýymen aqtyq synǵa ótti. Madınanyń tobynan Roza Muqataeva tálimgerinen 40 paıyz alsa da, ortaq qorytyndy boıynsha 107,3 paıyz jınap, 92,7 paıyz daýysqa ıe bolǵan Marhaba Sábıevadan alǵa shyqty. Tap osylaı Janǵalı Ábishev te tálimgerinen 40 paıyz daýys alǵanymen, ortaq qorytyndy boıynsha 102,2 paıyzǵa ıe bolyp aqtyń synǵa jol tartty. Al Batyrhan 97,8 paıyzben kelesi kezeńge ótpeı qaldy.
«Qazaqstan» AQ» respýblıkalyq teleradıo kesheni baspasóz qyzmetiniń habarlaýynsha, tikeleı efır sońynda «Qazaqstan daýysy» ataǵyna baq talasatyn 4 ónerpaz anyqtaldy. Endi 19 qańtar, jeksenbi kúni aqtyq synda Shaharızat Seıdahmet, Tımýr Omarov, Roza Muqataeva jáne Janǵalı Ábishev baq synaıdy. Olar sahnada elimizdiń áıgili ánshilerimen jáne óz tálimgerlerimen birge qosylyp án shyrqaıdy. Olardyń ónerin, bul joly tek kórermen baǵalaıdy. Sonymen, «Qazaqstan daýysyna» laıyqty ónerpazdy tańdaıtyn sheshýshi sát jaqyndady. Bes mıllıon teńge men «Universal» dybys jazý kompanııasynyń kesimsharty kimge buıyrady? Ony anyqtaıtyn - kórermen. Qymbatty kórermen, qapy qalmaı daýys berińiz! Eger qosar oıyńyz, aıtar tilegińiz bolsa, SMS habarlama jiberýlerińizge bolady. Sizderdiń pikirlerińiz úmitkerlerdiń jobadaǵy taǵdyryn sheshedi. Qyzyqty pikirler men salmaqty oılaryńyz «Qyzyl bólmede» qyzý talqylanady.
