Kım Chen Yn zymyrandy jasap shyǵarýshylarǵa memlekettik nagradalar tabystady
ASTANA. QazAqparat - Koreı halyq demokratııalyq respýblıkasynda "Hvason-14" qurlyqaralyq ballıstıkalyq zymyranyn sátti synaqtan ótkizý eldiń strategııalyq ustanymyn túbegeıli ózgertti. Bul týraly beısenbi kúni Soltústik Koreıanyń kóshbasshysy Kım Chen Yn málim etti, dep habarlaıdy QazAqparat TsTAK aqparattyq agenttigine silteme jasap.
«Bul oqıǵa ekonomıkany damytýmen bir mezgilde ıadrolyq kúshterdi nyǵaıtý jónindegi partııa tańdaǵan baǵyttyń negizdiligin rastady», - dep keltiredi respýblıka kóshbasshysynyń sózin KOTA agenttigi. Kım Chen Yn qorǵanys ónerkásibimen aınalysatyn ǵalymdar men tehnologtar «Jasap shyǵar nemese ól!» uranymen áskerı kepildikterdi qamtamasyz etýde jańa tabystarǵa qol jetkizetinine senimdi.
Qurlyqaralyq ballıstıkalyq zymyranyn jasap shyǵarǵandar Kım Ir Sen, Kım Chen Ir ordenderimen marapattaldy. Olarǵa «Balǵa men oraq» belgilengen altyn medaldar men Memlekettik tý birinshi dárejeli ordeni tabystala otyryp, KHDR Batyry, KHDR Eńbek Eri ataǵy berildi. Al tehnologtardyń, jumyskerler men ınjenerlerdiń úlken tobyna Kım Ir Sen men Kım Chen Irdiń beınesi beınelengen saǵattar men qazirgi el kóshbasshysynyń naqyl sózderi toptastyrylǵan jınaq tabys etildi.
KOTA derekterine sáıkes, Kım Chen Yn zymyrandy ushyrý týraly buıryqqa 3 shildede qol qoıǵan. Ol polıgondaǵy synaqqa ózi basshylyq etti. Zymyrannyń ushyrylym ýaqyty - 39 mınýtty, uzaqtyǵy - 933 shaqyrymdy, bıiktigi 2802 shaqyrymdy qurady.
