Kım Chen Yn: Koreıa túbegindegi jaǵdaıdy turaqtandyrdyq
PHENЬıAN. QazAqparat - Seısenbi kúni Soltústik Koreıa kóshbasshysy Kım Chen Yn óńirdi turaqtandyrǵan Amerıka Qurama Shtattarymen Koreıa túbegin ıadrolyq qarýsyzdandyrý týraly kelissózderdi ilgeri damytýǵa úmittenetinin jetkizdi, dep habarlaıdy QazAqparat Renhap agenttigine silteme jasap.
Kım mundaı pikirdi Ońtústik Koreıa prezıdenti Mýn Chje Inmen Phenıandaǵy úshinshi ekijaqty sammıt kezinde bildirdi. Ol 12 maýsymda Sıngapýrde AQSh prezıdenti Donald Tramppen tarıhı kezdesý ótkizýge yqpal etkeni úshin Ońtústik Koreıa prezıdentine alǵys aıtty.
«Prezıdent Mýn Soltústik Koreıa men AQSh arasynda tarıhı kelissózder ótkizýge kómektesti», - dedi Soltústik Koreıa kóshbasshysy Phenıandaǵy sammıtte.
«Osynyń arqasynda óńirdegi ahýal turaqtandy. Prezıdent Mýnnyń qosqan úlesi úshin taǵy da rahmet aıtamyn», - dedi Kım.
Aıta ketken jón, Ońtústik Koreıa prezıdenti osy sammıt barysynda soltústikkoreıalyq áriptesin «batyl sheshim qabyldaǵany» úshin maqtady.
Mýn Phenıanǵa tańerteń erte kelip, osy elge kelgen Ońtústik Koreıanyń úshinshi kóshbasshysy atandy. Kóshbasshylar kezdesýi Koreıa Jumys partııasy Ortalyq komıtetiniń shtab-páterinde ótti. Bul Soltústik Koreıa kóshbasshysynyń sheteldik memleket basshysyn Jumys partııasy Ortalyq komıtetiniń keńsesinde alǵash ret qabyldaýy edi.
Kezdesý barysynda Ońtústik Koreıa prezıdenti álemge Soltústik Koreıanyń Koreıa túbegin ıadrolyq qarýsyzdandyryp, beıbitshilik ornatýdy qalaıtynyn kórsetý qajettigin atap ótti.
«Búkil álemniń nazary bizde, sondyqtan álemdegi barlyq adamdarǵa beıbitshilik pen gúldenýdiń jemisin kórsetemiz dep úmittenem», - dedi Mýn.
Basqosý jergilikti ýaqytpen keshki saǵat 5:45-te aıaqtaldy. Mýn men Kım sársenbi kúni tańerteń kelissózderdiń ekinshi kezeńin ótkizý úshin kezdesedi.
