Kım Chen Irdiń uly eldiń bılik júrgizýshi partııasynda negizgi qyzmetterge taǵaıyndaldy
ASTANA. Qyrkúıektiń 29-y. QazAqparat - Soltústik Koreıa basshysy Kım Chen Irdiń kenshe uly - Kım Chen Ýn soltústikkoreılik Eńbek partııasyndaǵy negizgi qyzmetterge taǵaıyndaldy. Atap aıtqanda, Kım Chen Ýn bılik júrgizýshi partııanyń Ortalyq Komıtetine kirdi, sondaı-aq Koreıa Halyq Demokratııalyq Respýblıkasynyń Ortalyq áskerı komıssııasy tóraǵasynyń orynbasary bolyp taǵaıyndaldy.
Al osydan bir kún buryn Kım Chen Ýnǵa armııa generaly ataǵy berilgen bolatyn. Eńbek partııasynyń áskerı komıssııa basshysynyń orynbasary bolyp taǵaıyndalǵannan keıin Kım Chen Ýn Soltústik Koreıanyń áskerı saıasatyn anyqtaýǵa áser etý múmkindigin alyp otyr.
Oǵan qosa, Kım Chen Irdiń apaıy - Kım Gen Hı hanymnyń Eńbek partııasynyń Ortalyq komıtetindegi óz ornyn saqtap qalǵany da málim boldy.
Sońǵy kezde, 68 jastaǵy Kım Chen Irdiń jasy 30 tolmaǵan Kım Chen Ýndy óziniń murageri etip taǵaıyndaý yqtımaldyǵy týraly áńgimeler jıi aıtyldy. Sońǵy eki kúnde oryn alǵan oqıǵalar, sarapshylardyń pikirinshe, osy paıymdaýdy rastap otyr.
