Kım Chen Yn Soltústik Koreıa flotyn kúsheıtýge kiristi
ASTANA. KAZINFORM — Soltústik Koreıa basshysy Kım Chen Yn aımaqtaǵy shıelenistiń kúsheıýi men qarsylastary tarapynan tóngen qaýip-qaterlerge baılanysty eldiń áskerı-teńiz flotyn jańǵyrtý jumystaryn jedeldetýdi tapsyrdy. Bul týraly Kazinform Anadolu agenttigine silteme jasap habarlady.
Koreı ortalyq telegraf agenttiginiń málimetinshe, Kım Chen Yn Nampho qalasyndaǵy keme jasaý zaýytyna baryp, jańǵyrtý jumystarynyń barysymen tanysqan. Sondaı-aq salynyp jatqan áskerı kemeni kórdi.
— Teńizdegi ulttyq egemendikti túrli qaýip-qaterden qorǵaý úshin jerústi jáne sýasty kúshteriniń jaýyngerlik múmkindikterin jedel arttyrý — zaman talaby, — dedi Kım Chen Yn.
Soltústik Koreıa basshysy aımaqtaǵy geosaıası jaǵdaı men «qarsylastarynyń áreketterine» nazar aýdardy. Onyń aıtýynsha, qalyptasqan ahýal eń zamanaýı ári qýatty áskerı kemeler jasaýdy qajet etedi.
Agenttik málimetinshe, tehnıkalyq sıpattamalary jarııalanbaǵan jańa keme qazirgi zamanǵy soǵys jaǵdaılaryn eskere otyryp, túrli áskerı mindetterdi oryndaýǵa arnalǵan.
AQSh-pen dıalog — «múmkindikterdiń biri»
Al Soltústik Koreıa basshysynyń ápkesi Kım E Chjon búgin jarııalaǵan jazbasha málimdemesinde AQSh-pen dıalog beıbitshilikke qol jetkizýdiń «bir joly» ekenin, alaıda onyń Soltústik Koreıanyń ulttyq múddelerine mindetti túrde saı kele bermeıtinin aıtty.
Onyń sózinshe, Vashıngton tarapynan jalǵasyp jatqan «dushpandyq belgiler» Phenıandy AQSh ákimshiliginiń «shynaıy nıetin» qaıta baǵalaýǵa májbúrlep otyr.
— Beıbitshilikti tańdaý, sózsiz, dıalog múmkindigin de qarastyrady. Alaıda bul bizdiń ulttyq múddelerimizben esh jaǵdaıda birdeı emes. AQSh-tyń dushpandyq saıasatynan bas tartýy barlyq máseleni sheshýdiń negizgi sharty. Bul oryndalmaıynsha, AQSh-pen tikeleı kelissóz júrgizýge eshqandaı negiz joq, — dedi Kım E Chjon.
Buǵan deıin Kım E Chjon AQSh Federaldyq tergeý bıýrosynyń (FTB) Soltústik Koreıany álemdegi eń iri Binance krıptovalıýta bırjasynan 6 mıllıard dollardan astam qarajat urlaýǵa qatysy bar dep aıyptaýyn da joqqa shyǵarǵan bolatyn.
— Koreı Halyq Demokratııalyq Respýblıkasynyń krıptovalıýta qaraqshylyǵyna qatysy bar degen jalǵan oqıǵa — AQSh-tyń bizdiń elge qatysty dushpandyq saıasatynyń mánin kórsetetin aısbergtiń ushy ǵana, — dedi Soltústik Koreıa basshysynyń ápkesi.
Eske salaıyq, buǵan deıin Soltústik Koreıa taǵy da jańa zymyran ushyrǵanyn habarlaǵan edik.
Ońtústik Koreıanyń Birikken shtab bastyqtary komıtetiniń málimeti boıynsha, Soltústik Koreıa sársenbide Japon teńizine qaraı birneshe zymyran ushyrǵan. Bul shamamen on qysqa qashyqtyqqa ushatyn ballıstıkalyq zymyran ushyrylǵannan keıin birneshe kún ótken soń boldy.
