Kım Chen Ynnyń ápkesi Soltústik Koreıanyń ıadrolyq mártebesin májbúrli tańdaý dep atady

ASTANA. KAZINFORM – Soltústik Koreıa kóshbasshysynyń ápkesi Kım E Chjon Ońtústik Koreıa, AQSh jáne Japonııanyń Phenıandy denýklerarızatsııalaý boıynsha jaqynda jasaǵan málimdemesin synady, dep habarlaıdy Yonhap aqparat agenttigi. 

Soltústik Koreıa kóshbasshysy Kım Chen Ynnyń ápkesi, Koreıa Jumysshy partııasy Ortalyq komıteti bólim meńgerýshisiniń orynbasary Kım E Chjon bul málimdemeni sársenbi kúni osy elderdiń ótken aptada úshjaqty kezdesýiniń qorytyndysyna jaýap retinde jasady.

Ońtústik Koreıanyń Syrtqy ister mınıstri Cho The El, AQSh memlekettik hatshysy Marko Rýbıo jáne Japonııanyń Syrtqy ister mınıstri Takesı Ivaıa ótken beısenbide ótken NATO otyrysy aıasynda Soltústik Koreıanyń ıadrolyq qarýsyzdanýyn qoldaıtynyn rastady.

Kımniń pikirinshe, birlesken málimdeme úsh eldiń Soltústik Koreıanyń ıadrolyq qarýsyzdandyrylýyna qatysty alańdaýshylyǵyn tanytyp otyr. Óıtkeni olar onyń «oryndalmas arman» ekenin túsinedi. 

— Eger olar shynymen de «denýklearızatsııaǵa» sene otyryp, ony qatty talap etse, olardy aqymaq dep ataǵan jón, - dedi ol Koreıanyń Ortalyq telegraf agenttigi taratqan málimdemede.

Ol sondaı-aq Soltústik Koreıanyń «ıadrolyq memleket» mártebesi «dushpandyq syrtqy qaýip pen qazirgi jáne bolashaq jahandyq qaýipsizdik arhıtektýrasyndaǵy ózgeristerdi dál kórsetetin májbúrli tańdaýdyń qorytyndysy» ekenin atap ótti.

Óz kezeginde Kım qarýsyzdaný máselesin talqylaý nemese «ıadrolyq qarýsyzdandyrýdyń eskirgen tujyrymdamasyn» qaıtarý áreketteri Soltústik Koreıanyń egemendigin joqqa shyǵarý jáne eldi «konstıtýtsııasy men áleýmettik júıesinen bas tartýǵa» májbúrleý áreketimen para-par ekenin aıtty.