Kım Chen Ynnyń ápkesi AQSh Soltústik Koreıany arandatyp otyr dep málimdedi

ASTANA. KAZINFORM – Koreıanyń Jumys partııasy Ortalyq komıteti bólim meńgerýshisiniń orynbasary Kım E Chjon «AQSh-tyń dushpandyq saıasaty» KHDR-ǵa óziniń «ıadrolyq soǵysty tejeıtin kúshterin» nyǵaıtýǵa sebep berip otyrǵanyn málimdedi, dep habarlaıdy Koreıa Ortalyq telegraf agenttigi. 

— AQSh jaǵdaıdy ýshyqtyratyn ádettegi arandatýshylyq áreketterin toqtatpaı otyr, — delingen KHDR kóshbasshysynyń ápkesi Kım E Chjonnyń málimdemesinde.

Onyń atap ótýinshe, AQSh-tyń strategııalyq aktıvteriniń Koreı túbeginde únemi oryn alýy «ózimizdi-ózi qorǵaıtyn ıadrolyq soǵysty tejeý kúshterimizdi nyǵaıtýdyń ózektiligin» tanytyp otyr. 

Kım E Chen 2 naýryzda AQSh Áskerı-teńiz kúshteriniń áýe kemesi Ońtústik Koreıanyń Pýsan portyna kirgenin eske saldy.

— AQSh Áskerı-teńiz kúshteriniń «Carl Vinson» ıadrolyq ushaq tasyǵyshy basqaratyn ekpindi toby «KR (Koreıa Respýblıkasy) jáne AQSh alıansyn kórsetý» jáne «ózara qoldanýdy kúsheıtý» syltaýymen 2 naýryzda Koreıanyń Pýsan operatsııalyq bazasyna kirdi, — dedi ol.

Onyń pikirinshe, AQSh-tyń jańa ákimshiligi «burynǵy ákimshiliktiń KHDR-ǵa qarsy dushpandyq saıasatyn» mura etti.

— Eger AQSh áskerı kúshterin kórsetý boıynsha rekordty jańarta berse, biz de strategııalyq tejeý kúshterin paıdalaný boıynsha rekordty jańartýǵa májbúr bolamyz, — delingen málimdemede.

Ol sondaı-aq «dushpandardy» Soltústik Koreıanyń ózin qorǵaý qabiletin synamaýǵa shaqyrdy

— Dushpandar óz quraldarynyń barlyq arsenalyn paıdalana otyryp, bizdiń erik-jigerimiz ben memlekettiń egemendigi men qaýipsizdik múddelerin qorǵaý qabiletin synamaýy kerek. Bul óte qaýipti is, - dep túıindedi Kım E Chjon.

Buǵan deıin habarlanǵandaı, Kım Chen Yn Soltústik Koreıanyń ıadrolyq qalqanyn nyǵaıtýǵa shaqyrdy.