Kım Chen Yn Ońtústik Koreıa men AQSh-tyń birlesken jattyǵýlaryn synǵa aldy

ASTANA.KAZINFORM - KHDR basshysy Ońtústik Koreıa men AQSh-tyń birlesken áskerı oqý-jattyǵýlaryn synap, olar Soltústik Koreıaǵa qatysty «dushpandyq» ustanymda ekenin aıtty, dep habarlaıdy Yonhap.

Onyń málimdemesi Seýl men Vashıngton Soltústik Koreıaǵa qarsy birlesken qorǵanys daıyndyǵyn kúsheıtý úshin jyl saıynǵy jazǵy Ulchi Freedom Shield (UFS) jattyǵýlaryn bastaǵan kezde aıtyldy. Jattyǵýlar dúısenbide bastalyp, 11 kún boıy 28 tamyzǵa deıin jalǵasady.

Kım Chen Yn Seýl men Vashıngtondy aýqymdy jattyǵýlar ótkizý arqyly Phenıanǵa qarsy «dushpandyq jáne qarama-qaıshylyqty ustanýǵa nıetterin ashyq bildirdi» dep aıyptady.

- AQSh pen Koreıa Respýblıkasynyń kúsheıtilgen áskerı odaǵy – bul kúsh kórsetý, soǵys órtin tutatýdyń aıqyn kórinisi, óńirde beıbitshilik pen qaýipsizdikti buzýdyń kózi, - dep keltiredi Soltústik Koreıanyń Ortalyq aqparat agenttigi (KCNA) Kımniń sózin.

Ol sonymen qatar ýaqyt ótken saıyn kúrdelenip kele jatqan qaýipsizdik baǵytyndaǵy jaǵdaı QHDR-diń ıadrolyq áleýetin jedel keńeıtýdi talap etetinin jetkizdi. Ol jaý jaǵy ózderiniń oqý-jattyǵýlaryna ıadrolyq elementterdi qosa otyryp, áskerı alıans quryp jatyr dep málimdedi.

Soltústik Koreıa Seýl men Vashıngton ótkizip kele jatqan birlesken áskerı jattyǵýlardy burynnan aıyptaıdy jáne olardy basyp alý daıyndyǵy dep atady. Al odaqtastar jattyǵýlardyń qorǵanys maqsatynda ekenin aıtady.

Soltústik Koreıa kóshbasshysy málimdemesin prezıdent Lı Chje Menniń Bostandyq kúnine oraı sóılegen sózinde Soltústikke tatýlyqqa beıim ekenin kórsetetin qadam jasaǵannan keıin jarııalady.

Ol Soltústik Koreıanyń saıası júıesin qurmetteıtinin aıtty. Ol sondaı-aq shıelenisti azaıtýǵa baǵyttalǵan 2018 jyly toqtatylǵan koreıaaralyq áskerı kelisimdi qalpyna keltirý boıynsha sharalar qabyldaýǵa ýáde berdi.

Alaıda, Soltústik Koreıa kóshbasshysynyń ápkesi Kım E Chjon Soltústik Koreıanyń Ońtústik Koreıamen qarym-qatynasyn jaqsartýǵa nıeti joq ekenin aıtty.

Osyǵan deıin Máskeýden Soltústik Koreıaǵa alǵashqy tikeleı reıs Phenıanǵa qonǵany týraly jazdyq.