Kım Chen Yn qyzyn murager retinde daıyndap jatyr – BAQ

ASTANA. KAZINFORM – KHDR basshysy Kım Chen Yn óziniń qyzy Kım Chjý Eni murageri etip taǵaıyndaýdy kózdep, onyń mártebesin nyǵaıtý baǵytynda jumys istep jatyr. Bul týraly Ońtústik Koreıanyń Ulttyq barlaý qyzmetine (NIS) silteme jasap Reuters habarlady.

Seýlde Kım Chjý E jaqyn arada bıleýshi Eńbek partııasynyń otyrysyna qatysýy múmkin ekenin joqqa shyǵarmaıdy. Barlaý qyzmetiniń baǵalaýynsha, onyń otyrysqa qatysýy, tanystyrylý formaty jáne resmı mártebe berilýi bılikti tapsyrý josparynyń janama dáleli bolýy múmkin.

NIS-tiń jabyq brıfınginen keıin depýtat Lı Son Kyn málimdegendeı, ońtústikkoreıalyq barlaý qoldanatyn tujyrym ózgergen: buǵan deıin Kım Chjý Eniń kandıdatýrasy «qarastyrylyp jatyr» delinse, qazir ol «murager retinde taǵaıyndalý satysynda» degen tirkes qoldanylyp otyr.

Ońtústik Koreıa barlaýy onyń el basshylyǵyna daıyndalyp jatqanyn alǵash ret 2024 jylǵy 29 shildede habarlaǵan bolatyn. Sonymen qatar stsenarıı ózgerýi múmkin ekeni jáne basqa kandıdattyń tańdalýy da yqtımal ekeni aıtylǵan.

Kım Chjý E ákesin áskerı parad pen resmı is-sharalarda jıi birge erip júredi. 2025 jylǵy qyrkúıekte ol ákesimen birge Qytaıǵa barǵan. Sol kezde Yonhap agenttigi bul birlesken sapar bılikti tapsyrýǵa daıyndyqtyń belgisi bolýy múmkin ekenin jazǵan. Sarapshylardyń baǵalaýynsha, onyń jasy shamamen 13-te, naqty týǵan kúni jarııalanbaǵan. 

Aıta ketelik Soltústik Koreıa zymyran men snarıad óndirisin arttyratyny týraly jazǵan edik.