Kım Chen Yn KHDR Eńbek partııasynyń bas hatshysy qyzmetine qaıta saılandy

ASTANA. KAZINFORM — KHDR kóshbasshysy Kım Chen Yn ótip jatqan partııa sezinde Koreıa Eńbek partııasynyń bas hatshysy qyzmetine qaıta saılandy, dep habarlaıdy Yonhap.

Koreıanyń Ortalyq telegraf agenttiginiń málimetinshe, partııanyń IX sezi «partııany nyǵaıtý, damytý jáne ulttyń órkendeýin qamtamasyz etý maqsatynda joldas Kım Chen Yndy bas hatshy qyzmetine qaıta saılaý týraly» sheshim qabyldaǵan.

Agenttik partııa músheleri, halyq pen ásker tarapynan bul sheshimge «tolyq qoldaý» bildirilgenin atap ótti.

Sheshim Koreıa Halyq Demokratııalyq Respýblıkasynyń Eńbek partııasy seziniń tórtinshi kúni qabyldandy. Sezd qorytyndysy boıynsha aldaǵy bes jylǵa arnalǵan memlekettik saıasattyń negizgi baǵyttary aıqyndalady dep kútilip otyr. Olardyń qatarynda ekonomıka, qorǵanys jáne syrtqy baılanystar máseleleri bar.

Aıta keteıik, Kım Chen Yn qyzyn murager retinde daıyndap jatyr. 

Sondaı-aq KHDR kóshbasshysy Kım Chen Yn prezıdent statýsyn alýy múmkin.