Kım Chen Yn KHDR áskerin soǵysqa tolyq daıyn bolýǵa shaqyrdy
ASTANA. KAZINFORM – Soltústik Koreıa basshysy Kım Chen Yn armııa bólimshelerin soǵysqa tolyq ázir etý úshin jaýyngerlik daıyndyqty aıaqtaýǵa shaqyrdy. Ol áskerı daıarlyqty túbegeıli jetildirý qajettigin atap ótti, dep habarlaıdy KHDR Ortalyq telegraf agenttigi.
Kım Chen Yn bul týraly Koreıa Halyq armııasy rotalary komandırleriniń úshinshi sezi aıasynda uıymdastyrylǵan is-sharada aıtty.
KHDR basshysynyń sózinshe, rota komandırleriniń basty mindeti – óz bólimsheleriniń soǵysqa tolyq daıyn bolýyn qamtamasyz etý úshin jaýyngerlik ázirlik jumystaryn aıaqtaý. Onyń aıtýynsha, buǵan oqý-jattyǵýlar men jaýyngerlik daıyndyqty túbegeıli jaqsartý arqyly qol jetkizýge bolady.
Kım Chen Yn rota komandırleri eldiń qarýly kúshteriniń negizin nyǵaıtýdy jalǵastyratynyn aıtty. Sondaı-aq olardyń arqasynda armııanyń bolashaǵy zor ekenin atap ótti.
Eki Koreıa shekarasyndaǵy shıelenis kúsheıdi
Sońǵy ýaqytta Soltústik jáne Ońtústik Koreıa arasyndaǵy jaǵdaı 21 qyrkúıekte demılıtarızatsııalanǵan aımaqta bolǵan oqıǵadan keıin qaıta shıelenisti. Sol kúni jaıaý áskerge qarsy mına jarylyp, Ońtústik Koreıanyń úsh áskerı qyzmetshisi jaraqat aldy. Seýl bul oqıǵaǵa Phenıandy aıyptady.
Soltústik Koreıa jarylysqa jaýapty ekenin joqqa shyǵaryp, óz áskerı qyzmetshilerine oq atylǵan jaǵdaıda «dereý ári aıaýsyz» jaýap beretinin málimdedi.
KHDR basshysynyń ápkesi, Koreıanyń Eńbek partııasy jalpy ister departamentiniń jetekshisi Kım E Chjon 19 qazandaǵy málimdemesinde ońtústik shekarada «ońtústikkoreıalyq áskerı buzaqylardyń» áreketterine baılanysty «eleýli» turaqsyzdyq qalyptasqanyn aıtty. Ol sondaı-aq Seýl úkimetin arandatýshylyq jasady dep aıyptady.
Kım E Chjonnyń aıtýynsha, Phenıan ońtústik shekaraǵa ornalastyrylǵan taktıkalyq soqqy quraldarynyń sanyn arttyrý múmkindigin qarastyryp jatyr. Buǵan qosa, byltyr toqtatylǵan úgit-nasıhat habarlaryn daýyszoraıtqyshtar arqyly qaıta taratý máselesi de qarastyrylýda.
Óz kezeginde Ońtústik Koreıa Birikken shtabtar bastyqtary komıtetiniń basshysy Chın En Son aldyńǵy sheptegi áskerı bólimshege barǵan kezde áskerı qyzmetshilerge Soltústik Koreıa tarapynan jańa arandatýshylyqtar bolǵan jaǵdaıda batyl toıtarys berýdi tapsyrdy.
Eske sala ketsek, buǵan deıin Soltústik Koreıa sý astynan ushyrylatyn eki jańa zymyranyn synaqtan ótkizgenin habarladyq.
Budan bólek, jýyrda Soltústik Koreıa jasandy ıntellektisi bar torpedany synaqtan sátti ótkizgenin málimdedi.
