«Kim bilgish?»: joǵary synyp oqýshylary arasynda onlaın týrnır bastalady
NUR-SULTAN. QazAqparat – Qazaqstanda joǵary synyp oqýshylary arasynda «Kim bilgish?»: dástúrli onlaın týrnır bastalady, dep habarlaıdy QazAqparat.
Nursultan Nazarbaev qory men Memlekettik tildi damytý qory «Kim bilgish?» ıntellektýaldy-tanymdyq oıyny boıynsha 9, 10 jáne 11-synyp oqýshylary arasynda jyl saıynǵy halyqaralyq onlaın týrnırge qatysýǵa shaqyrady.
Oqýshy bul oıynǵa qatysýdan ne alady: zııatkerlik jáne tanymdyq qabiletterin damytý; este saqtaý, elestetý qabiletterin, sonymen qatar shyǵarmashylyq belsendilikterin arttyrý; eldiń mádenıetimen, tarıhymen tanysý jáne baǵaly syılyqtar.
«Kim bilgish?» týrnıri 2016 jyldan bastap ótkizilip keledi. Oıyn jyl saıyn jańartylyp, jańa suraqtar qosylýda. Aldyńǵy oıyndardyń qorytyndysy boıynsha respýblıkanyń ár óńirinen kelgen joǵary synyptardyń 50 oqýshysy arnaıy dıplomdar men baǵaly syılyqtardyń ıegerleri atandy (noýtbýk, planshet jáne smartfon).
Oıyndy qatysýshynyń qalaýy boıynsha qazaq, orys nemese aǵylshyn tilinde oınaýǵa bolady.
Onlaın-týrnırge qatysýǵa ótinimder 2021 jyldyń 1 maýsymy men 1 shildesi aralyǵynda qabyldanady. Týrnırge óz ótinimderin www.qazaq-found.kz saıtyndaǵy týrnırdiń arnaıy paraqshasyna aldyn ala jibergen respýblıkanyń jáne shet elderdiń barlyq orta mektep oqýshylary (9,10,11 synyptar) qatysa alady.
I jáne II kezeń 2021 jyldyń 1 shildesinen 1 qyrkúıegine deıin qashyqtan, onlaın rejıminde ótkiziledi. Qorytyndy kezeń Nur-Sultan qalasynda ótedi.
Jeńimpazdardy marapattaý rásimi 2021 jyldyń qyrkúıek aıynda Nur-Sultan qalasyndaǵy «Nazarbaev ortalygy» damý ortalyǵynda ótedi. Aqtyq kezeńde úzdik nátıje kórsetken qatysýshylarǵa baǵaly syılyqtar men arnaıy dıplomdar tabys etiledi.
Týrnır erejesimen Nursultan Nazarbaev qorynyń www.fnn.kz, Memlekettik tildi damytý qorynyń www.qazaq-found.kz, «kimbilgish.kz» saıttarynda, sonymen qatar qorlardyń resmı áleýmettik jelilerinde tanysýǵa bolady.
