«Kim bilgish» jáne «Meniń Qazaqstanym» mobıldi qosymshalarynyń tusaýkeser rásimi ótti

ASTANA. QazAqparat - 9 jeltoqsan kúni Astanada Memlekettik tildi damytý qory Qazaqstan Respýblıkasynyń Táýelsizdik kúnine oraı «Kim bilgish» mobıldi oıyny men «Meniń Qazaqstanym» mobıldi qosymshalarynyń tusaýkeser rásimin ótkizdi, dep habarlady atalǵan qordyń baspasóz qyzmeti.

Bul jobalar Qazaqstan Respýblıkasynyń Prezıdenti N.Á.Nazarbaevtyń tikeleı qoldaýymen, Elbasynyń «Jibek joly» beıbitshilik syılyǵyna alǵan qarjysyna ázirlendi.

«Kim bilgish» - túrli anımatsııalyq ádister men dybystyq júıe negizinde daıyndalǵan, san alýan taqyryptaǵy suraqtardy qamtıtyn ıntellektýaldy vıktorınalyq oıyn. Oıynda óz dostaryńmen de, kezdeısoq qarsylastarmen de jarysýǵa bolady. Qosymshada túrli deńgeıdegi tapsyrmalar, jumbaqtar jáne UBT suraqtary jınaqtalǵan. Oıyn barysynda ár túrli sanattaǵy suraqtardy tańdaýǵa bolady. Qosymshanyń basty ereksheligi - oıynshylardyń jarysyp oınaýyna múmkindik beretin týrnırler. Olardyń eki túri bar: klassıkalyq jáne oıynnan shyǵyp ketetin túri.

«Kim bilgish» mobıldi oıyny - álemdi tanyp-bilgisi keletin jańalyqqa jany qumar jastarǵa, qazaq halqynyń tarıhy men mádenıetin, salt-dástúrlerin bilgisi kelgen kópshilikke arnalǵan. Oıyn qatysýshylar arasyndaǵy saıys túrinde ótedi, alty raýnd boıy túrli suraqtarǵa jaýap berý qajet. Oıyn jeńimpazy durys jaýaptar sany boıynsha anyqtalady. Oıynnyń negizgi bólimderi: ǵylym, Qazaqstan tabıǵaty, HH ǵasyr, HHІ ǵasyr, densaýlyq, sport, Qazaqstan tarıhy, UBT jáne shartarap.

Tusaýkeser rásiminiń aldynda Astana qalasyndaǵy №48 mektep-lıtseıdiń joǵary synyp oqýshylary arasynda «Kim Bilgish» týrnıri ótkizilgen bolatyn. 10 synyp oqýshylary jarysty. Oıynnyń nátıjesi boıynsha 10 synyp oqýshysy Sansyzbaev Qýanysh jeńiske jetip, Qordyń arnaıy syılyǵymen marapattaldy. Jeńimpazǵa dıplom jáne planshet tartý etildi. Ekinshi oryndy ıelengen Omarov Ersaıyn da dıplommen jáne planshetpen marapattaldy. Oıyn barysynda belsendilik tanytqan oqýshylar da qosymsha syılyqtarǵa ıe boldy.

«Meniń Qazaqstanym» - eline, týǵan jerine degen súıispenshiligi zor kópshilikke arnalǵan mobıldi qosymsha. HD sapasyndaǵy fotosýretter jıyntyǵy: Elorda, Almaty qalasy, Qazaqstan tabıǵaty, sport, patrıottyq, tarıhı taqyryptaǵy sýretter, Qazaqstan týy men eltańbasy bar túsqaǵazdar. Bul qosymsha arqyly elimizdiń ánuranyn tyńdap, rıngtonǵa qosyp qoıýǵa, Qazaqstan ınfografıkasymen tanysýǵa, planshet jáne telefondy landshafttyq jáne portrettik rejımge ońtaılandyrýǵa bolady.

Bul qosymsha yńǵaıly da jedel ınterfeıs arqyly kompıýter, smartfon, planshet ekrandaryn san alýan sýrettermen, túrli taqyryptarmen bezendirýge múmkindik beredi.

«Kim bilgish» jáne «Meniń Qazaqstanym» mobıldi qosymshalary qazaq jáne orys tilderinde ázirlengen, IOS jáne ANDROID platformalarynda qoljetimdi. Bolashaqta osy qosymshalardyń aǵylshyn tilindegi nusqasyn jasaý josparlanyp otyr.

Qyzyqty is-sharaǵa jınalǵandar sońynda mektep-lıtseı daryndarynyń kontsertin tamashalady.