«Kim Bilgish?» respýblıkalyq bilim saıysyna ótinish qabyldaý bastaldy
ASTANA. QazAqparat - 20 mamyrda QR Tuńǵysh Prezıdenti - Elbasynyń Qory men Memlekettik tildi damytý qory jarııalaǵan «Kim Bilgish?» ıntellektýaldy-tanymdyq oıyny boıynsha 9,10,11 synyp oqýshylary arasynda respýblıkalyq onlaın týrnıri bastalady, dep habarlaıdy QazAqparat.
«Kim Bilgish?» týrnıri alǵash ret 2016 jyldyń kúzinde ótkizildi. Oıynnyń eki kezeńi onlaın rejıminde ótip, fınalǵa 2-shi týr nátejesi boıynsha eń kóp upaı jınaǵan oqýshylar qatysty. Astanada ótken qorytyndy oıynyna respýblıkanyń túrli aımaqtarynan 10 oıynshy qatysyp, jeńimpazdar arnaıy gramotalar men baǵaly syılyqtar ıelendi. Bıyl týrnır oqýshylarǵa tıimdi ýaqytta - jazǵy demalystarda ótkiziledi.
Jobanyń maqsaty - daryndy balalardy anyqtaý, oqýshylardyń tanymdyq qabiletterin yntalandyrý, pándik bilimderin tereńdetý, ǵylymǵa degen qyzyǵýshylyǵyn arttyrý, bilimdi nasıhattaý, ıntellektýaldy múmkindikterin damytýǵa atsalysý.
«Kim Bilgish?» oıyny sport, HH ǵasyr, HHІ ǵasyr, álemde, óner, Qazaqstan tarıhy, Qazaqstan tabıǵaty, densaýlyq, ǵylym taqyryptaryndaǵy 25 000-nan astam suraqtardan turatyn mobıldi qosymsha. Onlaın týrnır «Kim bilgish?» ıntellektýaldy oıyny boıynsha qatysýshylar arasyndaǵy saıys túrinde ótedi. Oıynshy alty raýnd boıy túrli kategorııalardaǵy suraqtarǵa jaýap berýi qajet. Oıyn jeńimpazy durys jaýaptar sany boıynsha anyqtalady. Týrnır qazaq nemese orys tilinde ótkiziledi.
Onlaın týrnırge qatysý ótinimderi 20 mamyrdan 30 maýsymǵa deıin qabyldanady.
Onlaın týrnırge qazaq-found.kz saıtynyń arnaıy baıqaý paraqshasyna aldyn-ala qatysýǵa ótinim jibergen respýblıkanyń joǵarǵy synyp oqýshylary (9,10,11 synyptar) qatysady.
І jáne ІІ týr 1 shildeden 31 tamyzǵa deıin onlaın rejıminde ótkizlse, bilim saıysynyń fınaly qazan aıynda Astanada bolady.
Týrnırdiń erejesimen Qazaqstan Respýblıkasy Tuńǵysh Prezıdenti - Elbasy qorynyń fpp.kz jáne Memlekettik tildi damytý qorynyń qazaq-found.kz saıttarynan jáne resmı áleýmettik jelilerinen tanysýǵa bolady.
