Qylmystyq jazany óteý mekemelerinde 38 myńnan astam beınekamera ornatyldy
ASTANA. KAZINFORM – Ótken jyldyń sońynda qyzmetkerlerdiń de, sottalǵandardyń da yqtımal zańsyz áreketterin baqylaýdy jáne aldyn alýdy qamtamasyz etý úshin jappaı beınebaqylaý júıesin engizý jobasy aıaqtaldy. Búgingi tańda qamaý oryndarynda 38 myńnan astam beınekamera ornatyldy. Bul týraly QR ІІM Qylmystyq-atqarý júıesi komıtetiniń tóraǵasy Teńizjan Jánibekov aıtyp berdi.
«Beınebaqylaýdyń arqasynda joba engizilgen sátten bastap 21 myńnan astam ustaý rejıminiń buzylýy anyqtaldy. 47 sýıtsıd jáne 4 qashý áreketiniń aldy alyndy, 9 janjaldy jaǵdaıdyń toptyq tóbeleske aınalýyna jol berilmedi», — dedi Teńizjan Jánibekov Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, birqatar sottalǵandar ózderiniń zańsyz áreketterin jasyrý maqsatynda beınekameralardy qasaqana zaqymdaıdy. Osyǵan baılanysty olardy qasaqana búldirgeni jáne joıǵany úshin qylmystyq jaýapkershilik engizildi. Jańa 428-1-bap boıynsha beınekameralardy búldirgeni úshin 7 jylǵa deıingi jaza qarastyrylǵan.
«Jalpy, júrgizilgen baqylaý men beınemonıtorıngtiń profılaktıkalyq áseri mekemelerdegi jedel jaǵdaıǵa oń áser etedi», — dedi T. Jánibekov.
Buǵan deıin spıker Qazaqstanda túrmedegi tutqyndar sany 7 myńǵa artqanyn aıtqan edi.
Sonymen birge, T. Jánibekov burynǵy mınıstr Qýandyq Bıshimbaev túzeý mekemesine ótkennen keıin qandaı jumys isteýi múmkin ekenin aıtyp berdi.
