Qylmystyq top 700-den astam sheteldiktiń Qazaqstanda turýyna zańsyz ruqsat ápergen

QARAǴANDY. KAZINFORM — Qaraǵandy oblysy prokýratýrasynyń bastamasymen Ulttyq qaýipsizdik komıtetiniń Qaraǵandy oblysy boıynsha departamentimen birlesip, qylmystyq toptyń qyzmeti toqtatyldy. 

Qylmystyq shemaǵa halyqqa qyzmet kórsetý ortalyǵynyń, medıtsınalyq mekeme qyzmetkerleri jáne «kómekshiler» dep atalatyndar kirgen.

Aqshalaı syıaqy úshin sheteldikterge ýaqytsha turýǵa 700-den astam ruqsat zańsyz berilgen.

Ýaqytsha turýǵa ruqsat alýǵa ótinish bergen kezde turǵyn úı ıesiniń jeke qatysýy men kelisimi talap etiledi, biraq sheteldikterdi tirkeý zań talaptaryn elemeı júrgizilgen.

Sonymen qatar, 2 elektrondy-tsıfrlyq qoltańba zańsyz shyǵarylyp, «eQonaq» aqparattyq júıesinde shetel azamattarynyń kelýin tirkeý týraly 30-dan astam habarlama berý úshin paıdalanylǵan.

Munyń bári elektrondy-tsıfrlyq qoltańba ıelerinen jasyryn jasalǵan.

Sheteldikterdi tirkeý boıynsha zańsyz shemalar el aýmaǵyna destrýktıvti tulǵalardyń kirýine múmkindik beredi.

Osy fakti boıynsha sotqa deıingi tergeý júrip jatyr.